Aizawl: Mizoram district khawpui pariat zingah Siaha chu khawpui len dan atanga chhutin za zelah leimin awm theihna ah a sang ber a, Kolasib chu a him bera ngaih a ni.

Tunhnaia tlangzarh tak 'Hazard Risk & Vulnerability Analysis of eight district headquarters' ah hian Mizoram district khawpui 8 te dinhmun zirchian a niin khuarel chhiatna chi thum leimin, thlipui leh lirnghing chungchanga mithiamte zirchianna dah a ni a. Leimin bikah chuan Siaha khawpui chu leimin awm theihna chance a nei sang ber a, khawpui sq.km 27.26 zinga 0.85 chu leimin awm theihna niin chance nei a nei sang ber a, Siaha khawpui 3.11% chu leimin awm theihna a ngaih a ni.

Siaha dawtah hian Serchhip leh Lunglei chu sang lehin an khawpui 1.84% chu leimin awm theihna a ngaih a ni a, Aizawl 1.32, Champhai leh Lawngtlai 0.49, Mamit 0.43 leh Kolasib 0.35 ten an dawt a ni. Heng hi khawpui zau dan atanga chhut a ni a. Leimin awm theihna hmun zau zawng ah chuan Aizawl khawpui ah zau berin sq.km. 2.05 chu leimin awm theihna (high risk zone) ah a awm a ni.

Science & Technology hnuaia Mizoram Remote Sensing Application Centre (MIRSAC) thawktute chuan leimin chu a ram awmdan (terrain) a zir te, ram hman dan leh leilung sawisak (laih) danah te thui tak a in nghat a ni tih Zalen palai an hrilh a. Khawpui chhunga leimin tamna chhan ber chu lei laih danin a zirloh vang nia an ngaih thu an sawi.

Leimin ah hian Aizawl khawpui chu leimin awm theihna bik hmun ngemaw zat a awm tih sawiin a bikin Hunthar, Hlimen, Sihpui ruam leh Ramhlun Sports Complex te chu a hlauhawm zual niin an sawi a. Heng bakah hian leilung hman danin a zirloh avangin a hmaa hlauhawm lo pawh hmun hlauhawmah a awm thei nia sawiin Sairang, MZU, Sihphir leh Durtlang te chu hmun him zualah an ngai tih Zalen an hrilh bawk.

Lirnghing thleng palh ta se assam type in aiin RCC building a hlauhawm ber dawn a, nunau, hmeichhia leh tar awm tamna ah te chhiatna thleng a tam zual thei niin zirchianna ah hian tarlan a ni.

Zalen palaiin mi thenkhat ten 'Mizoram leilung a upat loh avangin lirnghing a na dawn lo' nia an sawi zawhna chhangin MIRSAC thawktute chuan, "Lirnghing thawh nat danin a hril ber dawn a, lirnghing na ah chuan building hi tlu lo mahse a pil zawngin a thawk thei a ni," an ti bawk.

Thlipui (cyclone) chu Bay of Bengal vela intan tlangpui anih avangin Mizoram a lo thlen chuan a kalkawng a thui tawh avangin a chakna tam tak a hloh tawh a, chuvangin a na tawh lo thin niin zirchianna ah hian tarlan a ni.

MIZORAM-AH CHHIATRUPNA
Mizoram ah kum 250 kalta chhungin magnitude 4.0 chunglam lirnghing tum 11 a thleng tawh a, a na ber chu magnitude 6.1 a ni. Probabilistic Method hmanga an zirchiannaah chuan Seismic Zone V-ah Mizoram chhung 12705.69 sq.km. (60.25%) awmin, 8381.31 sq.km. (39.75%) chu Zone IV-a a awm nia hmuh a ni. A tlangpuiin Mizoram hmar lam hi chhim lam aiin a hlauhawm zawka ngaih a ni.

Mizorama chhiatna thleng hrang hrang kangmei, thli, ruah etc. zingah leimin chu chhiatna thlentu lianber a niin 98% lai a hauh phak.

AIZAWL MIN THEIH DAN
Zone Area sq.km Area%
Very high 2.05 1.32
High 32.21 20.75
Moderate 68.59 44.19
Low 43.18 27.82
Water body 0.17 0.11
Total 155.20 100.00

Thlipui (Wind & Cyclone) tleh thin dan leh a nat theih danah Building Material & Technology Promotion Council (BMTPC)-in India rampum ngaih tuaha an then danah chuan Zone sang ber ‘Very High Damage Risk Zone - A’ ah Mizoram pumpui hi a awm. MIRSAC-in a zirchianna ah chuan Mizoram hi Zone 3-ah then leh a ni a - Very High Zone ah 17.68%, High Zone ah 34.50 leh Moderate Zone ah 47.82% te a thendarh leh a ni a, Mizoram chhimlamah Very High Zone hi a tam zawk.