HBKCP Kuhva ro man kang ral nghal vek
Tualchhung
Jun 20, 2023

June 20, 2023:- Hachhek Bial Kuhva Chingtu Pawl (HBKCP) duty te chuan Nizan (19/6/24) dar 6:00 leh 7:00 inkar khan Kawrthah leh Rengdil inkar Ramrikawnah Kuhva ro quintals 100 chuang an man leh a, Kuhva ro te hi an manna hmunah unload-in a kang ral nghal vek a ni. Lirthei leh a khalhtu te chungah erawh kutthlak a ni lo.

ad
ad

Kuhva phurtu Hyva-Ashok Leyland MZ 01K 9510 khalhtu, Lalramthara S/o Lalnunsanga, Maubawk hian Kgs 80 dahna Kuhva bags 80 a phur a, Tata MZ 01S 6800 khalhtu Paumalsawma S/o Lunthanga, Bawngkawn-UPC mual hian bags 70 a phur thung. Man an nih lai hian Kawngpui aṭanga Quarry panna kawng penhleh deuhah dingin, Balu phur angin an insawi ve ve a ni.

An Kuhva phurh hi ramdang aṭanga tawlh luh ruk Kuhva ah chuan a quality ṭha ber chi a ni. Heng Kuhva ro an phurh te hi Pi Maduhi, Chaltlang Lily veng a mi ta niin a phurtu Driver te hian an sawi a, Champhai lam aṭanga lokal Aizawla inbanlek(transit)-a la chhawng niin an insawi bawk.

He thil thleng chungchangah hia HBKCP hruaitute chuan Dan phal loh thil a nih vanga Mamit District chhunga phur lut tawh lo tura khapna Thupek a awm reng lai leh HBKCP ngei pawhin ti lui tawh lo tura ngenna a siam hlim chhawn laia man tur a la awm cheu hi hriatthiam harsa an ti a, Dan phal loh Kuhva tawlhtu te hian Kuhva ching a eizawngtu mipuite hi an zah lovin an hmusit hle niin an ngai a ni.

HBKCP hruaitute chuan, hetiang thil a lo thleng leh a nih pawhin Thuchhuah an siam tawh ang khan a titute hian eng harsatna pawh tawk se an cho chhuahah an ngai a, mipui lungawi lo sosang inkhap daih pawh a harsa sawt hle niin an sawi a, "Mipui thinurna avang hian kan duh bak thil a thleng palh ang tih kan hlau tawh a ni," an ti.

Ti hian ni 3 chhungin HBKCP leh Kuhva chinga eizawngtu Mipui duty te chuan Dan phal loh Kuhva ro Truck lian trip 4 an man ta a, a vaiin quitals 300 vel a ni. Hetiang hi thil awmdan a nih avangin HBKCP leh Taitesena Group YMA te chuan a remchang hmasa berah meeting neih an tum bawk.

Latest News & Chhiar Hlawh