ZALEN March 30, 2025 : April thla atanga hman tan tur, Mizoram Universal HealthCare Scheme (MUHCS)-ah Mizorama private hospital 20 chuangte an tel dawn lo nia thudawn a ni a, cashless system a nih dawn avangin an tan tihngaihna a awm loah an ngai a. Hetihlai hian sawrkar lam chuan cashless chu policy-ah mipui an tiam tawh avangin an kaltlangpui lo thei lo a, private damdawi in pakhat theuh account-ah pawh Rs Nuai 50 dah lawk pawh chief minister a inhuam a hrilh tawh niin Health Minister Lalrinpuii chuan ZALEN a hrilh.

Damdawia inenkawlna senso pek ngai lo tura duan MUHCS chu March 19, 2025 khan Chief Minister Lalduhoma’n a tlangzarh a. Non Government Hospital Association of Mizoram (NGHAM) hruaitu pakhatin ZALEN a hrilh danin, an pawla tel private/kohhran damdawi in 20 chuangte chuan sawrkarin kalpui a tum dan chu tlinah an inngaih loh avangin vawiin thlengin MUHCS-ah hian an la tel lo a ni.

Hetihlai hian health minister chuan damdawi ina inenkawlna man cashless-a kalpui chu policy-a an lo tiam tawh a nih tawh avangin an kaltlangpui lo thei lo niin ZALEN a hrilh a, chumi tur atan chuan sawrkar damdawi in hrang hrangte pawh tihchangtlun mek a nih thu te, nurse 300 lak buaipui a nih thute sawiin ZMC&H-ah cabin 30, khum 82 leh MICU paruk an hawng thar tih a sawi.

Health minister chuan healthcare-ah Rs. Vbc. 13 dah nghal a nih dawn thu leh a rang lama tihhlawhtlin nghal a nih dawn thu a sawi bawk a. “Chief minister chuan private hospital-ah hian an lo invenna atan an bank account-ah sawrkarin Rs. Nuai 50 (per hospital) dah lawk a inhuam thu a sawi bakah bill pek tlak chhung hi a rei lo berah kar khat (ni sarih) ni se, a rei berah thla khat (ni 30) ni se, hemi hi sawrkarin a pel a nih chuan penalty chawi a inhuam thu a sawi bawk a. Kan meeting-ah pawh hlim tlang takin kan inthlah niin kan lo inngai zawk a ni,” tiin ZALEN a hrilh.

Lalrinpuii hian damlo na zual refer ngaite chu awlsam zawka refer board paltlang theih dan tur duan a ni bawk tih a sawi.

Sawrkar hnathawk contribution tur chungchangah health minister chuan, “Sawrkar hnathawkte contribution tur hi an luh tirh (entry basic) atanga chhut a ni a, chu chu 1% vel bawr chauh a ni. Tuna an hlawh basic (existing basic) atanga chhut phei chuan 1% pawh a tling mang lo a ni a. Tin, hlawh pum pui, gross salary atanga chhut phei chuan 0.5-0.75% vel bawr chauh a ni a, a bei tham hle,” a ti.

“Sawrkar hnathawkten MR bill hi thawhkhawm a, intumchawp anga ngaihdan a awm thei a. Hei hi a nihna takah chuan contribution an pe chung pawh hian sawrkar chuan 75% vel zet hi an damdawi bill a la chawisak dawn tho a ni,” tiin a sawi.

“Central sawrkar hnuaia thawkte hian central healthcare scheme hnuaiah thla tin contribution an pe thin a. Hei kum 1954 atang daih tawh a kalpui a ni a, pay comission a zir zelin an contribution zat hi siam danglam thin a ni. Chuvangin, healthcare contribution hi mi tih loh dan emaw, thil thar hlak emaw pawh a ni lem lo,” a ti.

Sawrkar hnathawk leh pensioner pawhin cashless hi an duh viau niin minister chuan a sawi bawk.

Sawrkar inhuamna leh ruahmanna

1. Chief minister chuan private hospital-ahte hian an lo invenna atan an bank account-ah sawrkarin Rs. Nuai 50 (per hospital) dah lawk a inhuam thu a sawi bakah bill pek tlak chhung hi a rei lo berah kar khat (ni sarih) ni se, a rei berah thla khat (ni 30) ni se, hemi hi sawrkarin a pel anih chuan penalty chawi a inhuam thu a sawi.

2. MUHCS hi April 1, 2025 atanga March 31, 2026 thleng atan a ni a. May, 2025 thleng inziah luh theih a ni ang a, inziak lut hman lo tan July, 2025 thleng late fee chawiin inziah luh theih a ni dawn a. Health sub-centre tinah inziah luh theih a ni a, online-a inziak lut duh tan https://linktr.ee/muhcs-ah inziah luh theih a ni.

3. Ruahman dan chuan MUHCS-ah hian chhungkaw pakhatin Rs 5,00,000 thleng inenkawlna senso chawi loin damdawi inah an inenkawl thei dawn a, an awm duhna ward azirin inziah luh man (premium) pek ngai zat a danglam a, general ward-a awm duh tan Rs 2,500, semi private ward-a awm duh tan Rs 5,000 leh private ward-a awm duh tan Rs 10,000 pek a ngai.