Mali-ah hian thla 16 chhunga sipai chakna hmanga sorkar pheh thlukna \um hnih a thleng tawh a, hei hi sorkar chak loh vanga puh a nih bakah France sipaiten sorkar an puihna a hnuhdawh rah ni tela ngaih a ni a. Hemi hnuah hian jihadist chetna hi a hluar thar hle.

Mali ram lailia helhovin bazar kal tur phur bus an lambunnaah mi 31 vel an thah tih thuneituten an sawi.

Tute nge an nih hriat lohte hian bus hi kapin a khalhtu an kap hlum a, bus hi an hal zui ta niin an sawi.

Thi tam ber hi hmeichhia an ni a, bazara hna thawk niin an hna kal tur niin EFE news agency chuan a tar lang.

Tun hnaiah jihadist pawl hrang hrang an chet nasa thar leh a, hetiang inbeihna pawh hi a tam thar hle.

A bul hnai khua, Bankass Mayor Moulaye Guindo chuan ‘bus hi an kap a, a ke an kap luak a, a chuangte pawh an kap’ niin Reuters news agency hnenah a sawi.

Chin hriat loh emaw, hliam tuar emaw pawh an awm ngei a rinawm thu a sawi.

Social media-a thlalak thehdarhah chuan bus hi a kang filh vek a, a ruangruh chauh a awm a, a chhungah mihring kang  bâng pawh a awm.
Bus hi chawlhkar khatah vawi hnih, Songo atangin km 10 vela hla, Bandiagara-ah bazar panin a tlan thin.

Beihna hi Africa khawmualpui khawthlang lama Mopti region an tiha thleng a ni a. Tun hnaiah al-Qaeda leh Islamic State firfiak pawl nena inzawmna nei helho an che nasa hle.

Mali-a sorkar inthlak meka thuneitu, May thlaa sipaiten sorkar an pheh thluk hnua sorkar thar chuan he thil thleng chungchangah hian engmah a la sawi lo.

A hma ni lawk khan helhovin hmar lama UN convoy an bei tawh a, civil mi pakhat thatin mi dang hliam an awm bawk.