Aizawl December 22. 2023 : Excise & Narcotics Department chuan December 21, 2023 (Ningani) chawhma dar 11:30 khan Hmawngkhawthlir kawn, Thingdawl leh Kolasib inkar kawngpui, National Highway 306-ah Heroin gram 691.600 (Hawng 55) leh a neitu nia puh mi pahnih – Zaithanmawia (34) s/o Malsawma, leh Lalrempuii (31) d/o Biakrawna(L), Kolasib Project veng ve ve nia inchhalte chu an man. Heroin phurhna atana an hman, Honda Activa Scooter Regn No MZ01N-2572 pawh hrensak nghal an ni.

Heroin vanga mante hi The Narcotic Drugs & Psychotropic Substances Act, 1985 tlawhchhanin thubuai siamsak an ni a, District & Sessions Court, Kolasib-ah hruai nghal an ni.

Excise & Narcotics Department-in 2023 Krismas & 2024 Kumthar vuatveta Mizoram puma Special Drive an neih mekah zu leh ruihhlo dapchhuah leh a manna kawnga theihtawpa tanpui thintu Branch YMA leh mimalte hnenah lawmthu an sawi bawk.