6.4.2022; Excise & Narcotics department chuan April 5, 2022 (Thawhlehni) zan dar 9:15 khan Champhai Tourist Lodge hnuai, New Champhai-ah Heroin gram 128 (Hawng 10) leh a neitu nia puh Tingzamhuaii (29) d/o Chindeihpianga (L), Kaptel, Myanmar-a khawsa nia inchhal chu an man.

Heroin vanga man Tingzamhuaii hi The Narcotic Drugs & Psychotropic Substances Act 1985 tlawhchhanin thubuai siamsak a ni.

Excise & Narcotics department thuchhuah tarlan danin, tunlaiin Mizoram hmun hrang hrangah khawchhak lam atanga lokal, wine chi hrang hrang leh Soju (Korean zu) zuar thin an awm nia hriat a ni a. Hengte hi 'Mizoram Liquor Prohibition Act 2019 (MLP Act 2019)' hmanga khap vek a nih avangin man theih an ni a, hetiang kawltute pawh dan tlawhchhana man theih an ni tih mipuite hriattir leh an ni.