Hmai bawl bawk maw!

Admin - Oct 09, 2021

A bawl tur chu a bawl tho, an ti..

Rilru hah avangin hmai a bawl thei a, hmai bawl avangin rilru a hah thei viau bawk! Hmai bawl hi mi tam tak harsatna a ni a, a inven dan leh enkawl dan tam tak awm bawk mah se a bawl tur chu a bawl tho ti ila a dik awm e. 

Hmai bawl hi a lansarh thin avangin pawm zam mai a harsa thin a, theih ang anga enkawl dan dap a ngai thin. Damdawi tha tak tak a chhuak teuh tawh a, ngeih zawng erawh a inang lo thei viau awm e. Chuvangin damdawi hmang loa hmai bawl laka inve dan leh a enkawl dan thenkhat tarlang teh ang :

1. Hmai phih : Ni khatah vawi khat tal hmai kan phih vek thin ang chu maw? Hmaih phih hian mawm leh bal a tireh a, chu chuan bawl insiam tur a veng thei a ni. Vunah hian bacteria a awm a, chu chuan vul khawi laiah mai pawh bawl a siam thei a, a bikin hmaiah bawl hi a awm duh bik. Hei vang hian hmai fai taka phih a pawimawh a, ni khatah vawi thum tal phin thin tur a ni. 

2. Vun : Vun mawm te hian bawl an nei duh bik niin mithiamte chuan an sawi a, a chhan chu an vunin mawm a pek chhuah tam vang a ni. Vun ro leh mawm nei kawp chi an awm leh a, chung mite chuan harsatna an tawk duh viau bawk. 
Mihring taksaah hian - chal, hnar leh khabe te hi a mawm duh bik a, chu chu 'T-zone' an ti a, bawl a insiam duh hle a ni.  

3. Khawih loh tur : Hmai bawl reng reng hi khawih loh a tha ber - mah se ava har si em! Kuta hmai khawih hian bal leh bawlhhlawh bakah bacteria a kai duh a, a theih hram chuan hmai khawih dawnin kut sil zel a tha. Loh theih loha khawih a ngai a nih pawhin kan duh lai tak chauh khawih tur a ni a, a dang chu khawih loh a tha. 

4. Makeup : Nula zingah makeup hmang ngai miah lo sawi tur an tlem hle ang, tun laiah chuan mipa pawh an bang tawh chuang lo! Makeup hman nasat hi hmai tan a tha lo a, theih hram chuan hman loh a him. Ngeih loh zawng hman palh chuan vun a tichhiat bakah bawl a siam awl sam hle - hmang tan chuan fai taka hmai phih leh thin tur a ni. 

Share now