Zothan Autoworks Pro Volleyball League 2022, chu nizan khan R. Dengṭhuama Indoor Stadium-ah hmeichhe final khelh niin Pro Volleyball league hnuhnung bera final-a chak zo lo, Bungkawn vanduai nawnin an khingpui Bethlehem Vengthlang lakah an tlawm. Final-a Bethlehem Vengthlang champion puitu Elisian Medaii chu tournament best spiker a thlan a ni.

Bethlehem Vengthlang nuho team hi an final luh vawi khatna nimahse an champion thei a, set hmasa ber an hloh hnuah an khelh dan siam remin, set thum la zawnin 18-25, 25-21, 25-14, 25-20 (3-1) in an lehthal leh thei. He inkhelah hian Elisian Medaii leh Lalmuanpuii te pahnih an chetha hle a, league an khelh hmasak berah Elisian-i tel lovin Bungkawn lakah hian set la lovin an lo tlawm tawh a, Serkawn, Lunglei nula hovin final-ah phuba an la thei ta a ni. 

Pro Volleyball hnuhnung berah Bungkawn hmeichhe te hi league-ah chak vek final-ah an tlawm a, kuminah league a chak leh vekin final-ah an vanduai nawn. Bungkawn star player F Lalparmawii'n khel tha tho mahse a point 16 vuak chhuah chu champion nan a tawk zo lo. Set khat-naa inkhel thunun zawk mahse set hnihna aṭangin Bethlehem Vengthlang an chungnung zawk a, an rinrawl Elisian chuan point 27 vaw chhuakin Muani'n point 22 a hmu bawk. 

Bethlehem Vengthlang tan Durtlang champion-puitu Muani leh tun Pro Volleyball star Elisiani'n inkhel boruak an tidanglam. Bungkawn spiker F-i'n chet a harsat ve thung. Bethlehem Vengthlang hi set khatnaah tlawm mahse set hnihna an la a, hawi kir tawh lovin inkhel an thunun tluan. Khuangpui nena players te au phurtu Bethlehem Vengthlang veng mipui te hian an champion theihna kawngah thui takin tha an thawh ve a tih ngam awm e. 

Star langsar nei lemlo Bungkawn hian 2019 finala an chak zawh tawh loh vangin chak ngei tumin an rawn thawk chhuak tih a hriat a, mahse Bethlehem Vengthlang player Elisiani leh Muani an ngam lo a ni ber. Anni pahnih tha taka an khelh theihna chhan KT Lalrinzuali chu tournament best setter-ah thlan a ni bawk. A khelh ve chinah a zawnin vawi thum D3 Business Player of the Night lawmman dawngtu Elisiani chu tournament spiker ṭha bera thlan a ni .

D3 Business Player of the Night
- Elisian Medaii (Bethlehem Vengthlang)

Amrit Premium Plus Cement Fan of the Night
- George-a (Bethlehem Vengthlang)
 
Player stats :  

BETHLEHEM VENGTHLANG
Elisian Medaii : point hmuh 27, point hloh 12
Lalmuanpuii : point hmuh 22, point hloh 6
VL Hmangaihzuali : point hmuh 1, point hloh 3
Flora Lalrinmawii : point hmuh 1, point hloh 3
Vansangzuali : point hmuh 1, point hloh 4

BUNGKAWN
F Lalparmawii : point hmuh 16, point hloh 9
FP Lalduhkimi : point hmuh 9, point hloh 5
R Malsawmtluangi : point hmuh 10, point hloh 4
RK Lalfakmawii : point hmuh 7, point hloh 4

MI MAL CHAWIMAWINA :

KT Enterprise Best Spiker
- Elisian Medaii (Bethlehem Vengthlang)
KT Enterprise Best Setter
- KT Lalrinzuali (Bethlehem Vengthlang)
KT Enterprise Best Receiver
- Lalmuanpuii (Bethlehem Vengthlang)
KT Enterprise Best Coach
- Lalhmingliani Sailo (Bethlehem Vengthlang)