Hmeichhe zinga US President hmasa ber Kamala Harris?

Admin - Nov 21, 2021

President a tha

United States Vice-President Kamala Harris chu hmeichhe zinga an ram president thuneihna chelh hmasa ber a ni ta.

President  thachhangdawltu hi Joe Biden-a’n a tih dan thin pangngaia a hriselna a endik hun chhung reilo te chu president dinhmun a lo chelh a ni.

Kum 57 mi, Harris-i hian minute 85 chhung, Biden-a’n Zirtawpnia anaesthesia avanga colonoscopy a tih chhung chu president thuneihna a lo nei a ni.

Biden-a doctor chuan endikna an zawh hnuah thuchhuah siamin president chu a hrisel a, a hna ti turin a tha tawk tih a sawi.

Damdawi thiamten an endik hi kum 79 a tlin hma lawka neih a ni.

Thuneitute chuan Harris-i hian president dinhmun hi a pisa pangngai, White House-a West Wing atangin a thawk tih an sawi.

Harris-i hi mihang hmeichhia leh South Asian American zinga US vice-president atana thlan hmasak ber a ni.

White House Press Secretary Jen Psaki chuan hetiang hun reilo te chhung thuneihna inhlan hi ruahman lawk a ni lem lo tih a sawi a; mahse, an ram danpuiah a theih tih a sawi.

“President George W Bush pawh khan hetiang deuh bawk hian kum 2002 leh 2007 khan a lo ti tawh,” tiin a thuchhuahah a tar lang.

VICE PRESIDENT A THA

President hi a hriselna endik a nih zawha White House-a a kir leh chuan hmel hlim takin a let a, “Ka tha vek e,” a ti.

President physician Kevin O’Connor pawhin, “President Biden-a hi a hrisel a, kum 78 mi niin president mawhphurhna chelh thei a ni,” a ti.

O’Connor chuan colonoscopy hmanga president a endiknaah hian thil harsa engmah hmuh a ni lo va, an hmuh chhun pawh awlsam taka paih theih a nih thu a sawi bawk.

Biden-a hi US president ni tawh zinga kum upa ber niin December, 2019 khan full medical examination a ti.

Hemi tum hian a doctor chuan a hrisel tha a, a chak a, president ni tur pawhin a tlin vek dawn tih a sawi.

Share now