ZALEN April 7, 2025 : Mizoram-ah kumin thla khat (January) chhunga nau piangah hmeichhia aiin mipa an tam zawk a, mitthi chhinchhiahah pawh mipa an tam zawk.

Economics & Statistics department chhinchhiah danin kumin January chhungin Mizoramah nau piang 2,127 an awm a, chung zinga 1,079 chu mipa niin hmeichhia 1,048 an awm a, hmeichhia aia nau piang mipa tamna 31 a ni.

Naupiangah hmeichhia aia mipa an tam zawk lai hian mitthi chhinchhiahah pawh mipa an tam zawk a, kumin thla khat chhunga mitthi chhinchhiah mipa 480 an awm laiin, hmeichhia 255 an awm a. Hmeichhia aia mipa tam zawkna 225 a tling.

Hetihlai hian tun hnai kum 11 chhungin Mizorama kohhran lian ber, Presbyterian Kohhrana Kristian Thalai Pawl (KTP) member thi mi 5,279 an awm a, chung zinga mi 4,632 (87.74%) zette chu mipa an ni a. Data atanga a lan danin, thalai thi zingah hmeichhia aia mipa tamna a sang hle.

ZALEN-in data a hmuh theih china tar lan a nih danin, tun hnai kum 11 (2013-2023) chhunga KTP member boral tam ber kum chu kum 2022 kha niin, hemi kumah hian KTP member mi 643 an thi a, KTP member thi zinga mi 567 chu mipa niin 88.18% a tling.

Kum 2020-ah KTP member thi an tlem ber a, mi 422 an thi a, an zinga mi 386 (84.64%) chu mipa niin hmeichhia 70 thi an awm bawk.

Central KTP-in a chhinchhiah, tun hnai kum 11 chhunga KTP member thi zawng zawng 5,279 zinga zaa 87.74% (4,632) zette chu mipa an ni a, mi dang zaa 12.25% (647)-te chu hmeichhia an ni.

Nau piang (January, 2025)

Mipa - 1,079 

Hmeichhia - 1,048

Total Birth  - 2,127

Mitthi (January, 2025)

Male - 480 

Female  - 255

Total  - 735