Kan hre theuh ang a, kan pi pute hun lai kha chuan, “Hmeichhhe finin tuikhur ral a kai lo, hmeichhia leh palchhia chu thlak theih,” tih te. Hmeichhiate khan hna an thawk nasa hle thin a, zingah an tho va, tui an chawi a, buh an deng a, ei rawng an bawl bawk a. Nulate pawhin tlangvalte tihlungnih loh hlau reng rengin an hun an hmang bawk thin. Hetiang hi ni mah se khawtlang, inchhungkhurah te an chan a tha chuang lo hle, mote ngat phei chu an dinhmun a tha lo hle. Hun a lo kal zel a, dan eng eng emaw a’n awm thar ve thin a; mahse, vawiin thleng hian chanchin duhawm loh tak tak kan la hre thin fo a nih hi. Awle, kan dinhmun, awmnem zawk an ni, tunge mawhphur, tih te i’n lo zirho dawn teh ang. Kan dinhmun: Sawrkarin hma a la zel a, tunah chuan hmeichhe engineer, doctor, professor, kan kat ve ta nuk mai, a lawmawm hle mai. Office-a thawk leh sumdawng, bazara thil zuar chenin, hmeichhia kan tam ve ta hle mai, hmeichhia deuh hlir emaw tih zawk tawh mai tur a ni. Lehkhathiam tak tak, chhungkaw chawmtu, enkawltu fel tak takte pawh kan tam ve ta hle mai. Hetiang a ni chung hian khawtlang, kohhran leh ram rorelnaah te an hmel hmuh tur a la awm lo hle. Tun hnuah hian quota an neih tak avangin local council/V.C. etc. tihah te kan hmu ve ta zauh zauh. Kohhran angah pawh hian a tenau deuhte tih loh chuan an la hmang mang lo, puithiam hna thawk tur phei chuan kawng a la inhawng lo hle. Hetih lai hian sawrkarin, Mizo Customery Law a siam tharah chuan hmeichhiate chan a tha sawt ve hle. Mahse, hei hi a kengkawhtute leh a hmangtu turte hian kan tangkaipuiin kan hmang tak tak thei ang em aw, i’n lo thlir zel teh ang. Awmnem zawk an ni: Siamtuin min duan danah hmeichhiate chu mipate tanpuitu tur, kawppui tura tih an ni a. Mipate angin tharum an nei lo va, an pianhmang pawh a dang lam hle a, an thil thlir dan leh duh zawngte pawh a inang lo hle. Hemi remchanga la a nawmchen nana vaubeh tawkte pawh hi hmun hrang hrangah an awm fo thin a. Hetiang tawkte hian an sawi chhuak ngam mai lawk lo thin, vau an nih vang te, tlangthan an hlauh ve vangte leh a dangte pawh a chhan a ni thei ang. Inchhungkhurahte pawh an pasalte kutthlak, diriam (domestic violence) an tawk fo thin a, Bible pawh hian kehthei dawma dawm zawk turin an pasalte a chah a ni. Chak lo zawk an nih vang hian kan duh duhin kan ti ngawt tur a ni chuang lo va, inchhungkhur leh khawtlangah te hian han awm ta lo ngat se chuan a khawharthlak turzia chu. Chuvang chuan alawm siamtu Pathian pawh khan Adama tan khan Evi a lo siam reng ni. Ram changkangah: Khawvel ram ropui leh changkang ber berte kan han thlirin, an hmeichhiate dinhmun a tha thawkhat thin hle a, t.v., internet, chanchinbu, etc. atangtein kan hmu fo thin ang. Hei vang hian ram awhawm, nuam an lo nih phah ta, ti ila, kan ti sual tampui lo vang. Hmeichhiate awpbehna, nekchepna ram, e.g. Arab ram angte han thlir ila, hausa hle mah se vawiin thlengin, keini takngial pawhin, chen nan emaw kan la awt chhin ngai lo chu a nih hi. Thenkhat chuan tun hnu mai hian lirthei khalhte pawh an phalsak ve a, hetih lai hian ram changkangah chuan vansangah an zintir vut vut tawh a ni. Ram changkang leh changkang lo tehnaah pawh hian hmeichhiate dinhmun that leh that loh hi tehfung pawimawh tak pakhat a lo ni ve reng a ni. Intodelhin, ropui thin viau mah sela, hmeichhiate chan a chauh si chuan hmasawnna a khingbai tlat a ni. Keini ramte pawh hian tan kan la nasa ve tawh viau a; mahse, Indian hmeichhia, han tih ai chuan, American, han tih chuan a zau halh, leng zau viau a ni. Nia, tehkhin chi chu ka An ni miah lo na a; mahse, kan ngaihsan leh entawn thin berte an ni miau si a, hmeichhiate dinhmun tha hi ram changkang zia deuh chu a lo ni. Tunge mawhphur? Mi hmingthang tak takte chanchin kan han en hian an naupan laia an nutena an kaihhruai dan leh enkawl dana an lawmzia te, thenkhat phei chuan, “Lo awm ta lo se chuan aw,” an ti vawng vawng a ni. Salvation Army lam pawh hian an pawimawhzia hriain kum tinin May chawlhni hmasa ber hi Nute Ni (Mother’s Day) atan an hmang ziah thin a ni. Thuthlung Hlui hunah pawh khan Israel faten an hmelmate an beihna kawngah khan hmeichhiaten hmun pawimawh tak tak an chang ve fo a ni. Mi hlawhtling tak tak kan tihte pawh hi han chhut chian chhut chian chuan an phenah hian an nupuite, emaw lo tanpui, theihtawpa lo bawihsawm thintu an nei thin, an ti. An lo pawimawh em avang hian khawvel pawhin a ngai pawimawh hle a. March 8 hi International Women’s Day?atan a puang hial a ni; tin, Mizoram sawrkar pawhin?July 6 MHIP?Day?hi holiday atan a puang bawk a ni. Hetiang hi ni mah se tam tak chuan awpbeh, nekchep?etc. an la hlawh reng tho va. Eng vang nge ni ang, tunge mawhphur, sawrkar hotute nge, khawtlang leh kohhran? A chhannaah chuan tu dang ni lovin, kan dante kengkawh thei tur leh an thate tichak turin nang leh kei hi mawhphurtu ngei chu kan lo ni. Sawi tawh angin sawrkarin hma nasa taka a la chung hian chanchin ngaihnawm loh hmuh tur leh hriat tur a la tam thin hle mai. Hetih lai hian keini state-te hi chu kan ziaawm viau tawh niin a lang. Eng pawh nise, hmeichhiate pawhin theihna leh chanvo ka nei ve a ni, tih inhriain, lo insang phek ve thin ila, kan awm awma awm tawp mai lovin; tichuan, hmalaknate pawh a kal chak sawtin, a hlawhtling thei ngei ang.