ZALEN May 13, 2025 : BJP Mizoram chuan May 14, 2025 chhun dar 12:00 hian 'Operation Sindoor' chu mipui chhanna atan leh ram venhimna atana indona a nih angin, ram Pasalthate zahna leh thlawpna lan tirna kawng zawhna neih turin ruahmanna an siam a, mi zawng zawng tel turin an sawm.

BJP Mizoram President Vanlalhmuaka chuan, "Ral hmatawnga awm Mizo tlangval Sipai huaisen chhung te, Ex-Service leh NGO te, Party hrang hrangte leh Mizo mipuite, he kawngzawh hi Party bil awm lova India mi kan nih anga buatsaih anih angin he hun ah hian lo tel vek turin kan sawm che u a ni," an ti.

Vanlalhmuaka chuan, "Operation Sindoor' ral hmatawnga awm India Sipai, Mizo tlangval huaisen te zahna chibai kan buk a che u. Mizoram Kohhran hrang hrang te leh Mizo mipuiten kan lo tawngtaipui reng che u a ni tih in lo hriat ngei kan duh a ni."

"Pahalgam, Jammu & Kashmir a Pakistan thlawp Firfiak ten pawisawi lo te pawng kahin Nunna hlu tak an chan kha pawi kan tiin an chhungte kan tawrhpui tak zet zet a ni," a ti.

"He indonaah hian kan Mizo tlangval huaisen engemaw zah ral hmatawngah an awm a. Kan ram tan zan mu lo leh thih huamin ral an do a ni," a ti bawk.