Aizawl : Aizawl; Covid 19 hripui leng vang leh ramri hrul buaina vangin, hnamdang Mizoram rawn luh tum a hma angin an la tam lo a, tun dinhmunah thla 1 chhunga Vairengte ILP Counter a Temporary ILP pek chhuah chu 2000 bawr vel a tling nia ngaih a ni. Hetihlai hian Assam police te man, Phainuam mi 4 chu bail a rawn chhuah tir an ni tawh.

Vairengte SDO (C) Isaac C. Lalrempuia hnen atanga ZALEN thudawn danin, Mizoram sawrkarin Covid 19 hripui leng chung-changa inkaihhruaina thlahdul a, hnathawh a phal tak avangte leh ILP hmang a rawn lutte, an hnathawhna hmun tur a inkhunghran a phal tak vangte in Temporary ILP hmanga Mizoram rawn lut nitin an awm reng a, hetihlai hian Covid hrileng leh ramri hrul buaina vangin tun hma ai chuan ILP hmanga Mizoram rawn lut hi an tlem hle.

Tunhnaia ILP hmanga rawn lut tam ber te chu Mizoram chhunga hmasawnna hnathawktu Company hrang hrang mi leh sa te an ni a, inkhunghran an hreh avangin mimal anga rawn lut erawh tun hma angin an tam rih lo.

Hetihlai hian September 2, 2021 a Phainuam mi 4 (kum 30-45 inkar leh naupang kum 14 mi, mipa vek) Phainuam atanga km 3 vela hla Assam lam luah chin a chakkhai lama kal AP ten an lo man, Silchar jail a dah leh Juvenile Justice Board (JJB) a thawn te chu bail in an rawn chhuah tawh a, August 17, 2021 a inbumna vanga Assam police ten an man nia ngaih, F. Lalrotluanga, Bilkhawthlir erawh an la rawn chhuah lo a, Silchar jail-ah a la awm mek nia hriat a ni.