The Writer’s Club leh Laisuih Zirbing Rûn bul tuma hripui (Covid-19) len laia khawvel pum huap Zofate tana thawnthu tawi inphuahsiaka a tha lawrkawm 20 chuanna lehkhabu, ‘Hripui leng kara hmangaihna’ tih, KC Vanlalruata buatsaih chu Nilaini khan MJA President C.Lalrambuatsaiha’n a tlangzarh.

Emerald Hotel, Treasury Square, Aizawla tlangzarh inkhawm hi Lalhmachhuana Zofa, The Writer’s Club president-in kaihruaiin lehkhabu tlangzarh bakah hian thawnthu tawi inziahsiaka lawmman dawngtute hnenah lawmman hlan an ni.

Thawnthu tawi inziahsiakah hian Mizoram bakah Zofate chenna - Burma, Myanmar, Manipur leh Tripura atangtein mi 100-in an thawnthu ziah an thehlut a, chung zinga chuan VL Muanpuia Chawngthu ziah, ‘Ngaihhruaina Rawmawl (Bûyao Zâi Wo Shênbiân)’ tih chu tha berah thlan niin Hmingtea Tlau ziah, ‘Kan sulhnu ka tahpui’ tih chu pahnihnaa thlan niin FC Lalthazuali thawnthu, ‘Hmangaihna Tluantling’ chu pathumna a ni.

A tha zual thlan chhuah ziaktu mi pathumte hnenah hian lawmmanah pawisafai leh citation an hlan an ni a, a ziak tha zual mi pangain consolation prize (pawisafai leh citation) an dawng bawk.

‘Hripui leng kara hmangaihna’ lehkhabu hi Synod Book Room leh lehkhabu dawr hrang hrangah lei theih tura chhawp chhuah a ni.