Aizawl: Covid-19 hripui vangin mi 4 an thihbelh leh a, tihian hri vanga Mizorama thi chu mi 178 an tling tawh. Hetih lai hian hrikai pawhin ziaawm lam a pan chho zel niin a lang a, ni 4 chhung chu a zawnin hri kai thar aiin dama chhuak an tam zawk.

Covid-19 vang hian Zirtawp zan dar 9:30 khan Magnath Rajbongshi (26), Lawipu veng chu ZMC ah a boral a. August ni 12 khan hri a kai tih hriatchhuah a ni a, hemi ni vek hian ZMC ah admit a ni. Zirtawp zan vek dar 10:50 khan VL Hmachhuana (61), Tuikual North chu ZMC ah a boral a. August ni 2 khan hri a kai tih hriatchhuah a ni a, hemi ni vek hian ZMC ah admit nghal a ni. Nimin zing dar 6:45 khan Baby Lalngaihzuali (35), Republic Vengthlang chu Covid-19 vangin ZMC ah a boral a. July ni 31 khan hri a kai tih hriatchhuah a ni a, hemi ni vek hian ZMC ah admit nghal a ni. Lalnunsiami (58), Zuangtui chu nimin chhun dar 12:10 khan Covid-19 vangin ZMC-ah a boral. July ni 28 khan hri a kai tih hriatchhuah niin July ni 31 khan ZMC-ah admit a ni. 

Hetih lai hian tunhnai ni 4 chhung chu hri kai thar aiin dam a chhuak an tam zawk a, August ni 11,2021 khan hri kai thar 863 hmuhchhuah anih laiin dam a chhuak 1012 an awm a, hei hi ni khat thil thua dam a chhuak an tam ber ni a ni. Aug.12 khan hri kai thar 576 hmuh a niin dam a chhuak 943 an awm a, ni 13.8.2021 khan hrikai 575 awmin dam 1002 an awm a. Nimin zing khan hri kai thar 524 awm lehin nimin tlai dar 5 thleng khan dam a chhuak mi 589 an awm a ni.

Zirtawpni ah hian sample 15020 enfiah a niin hrikai hmuhchhuah zat hi 3.48% a ni a, a pumpuia chhutin Covid-19 vei hmuhchhuah zat (positivity rate) pawh a tlahniam sawt sawt a ni. Mizoramah hri kai mi 47995 an awm tawh a, hrikai enkawlna hmun atangin dam a chhuak mi 36679 leh enkawl mek 11139 an awm mek a ni.