Kum lama upa zawkte chu ruh chak loh leh chet pawh harsat turah ngaih an ni a, mahse kum naupang zawkah pawh hetiang hi a awm ve thei tho tih hriat a tha awm e. Kan thil chin thin tha lo tak tak avangin kan ruh leh ruhchuktuahte hi a chak loin chet vel pawh a harsat phah thei a, taksa enkawl fimkhur hle a ngai tihna a ni. 

Mithiamte chuan heng chin dan tha lo hrang hrangte hian ruhna a thlen thei tih an sawi -
1. Mei zuk : Mei zuk nasat hi hriselna atan a tha lo tih chu hriat sa a ni, chutih rual chuan ruh leh ruhchuktuah tan harsatna a thlen thin tih hre lo eng emaw zat kan awm awm e. Mei zuk hian chuap tan harsatna a thlen ang bawk hian ruh tan harsatna a thlen thei a, zawi zawiin ruha cell te chu a tihlum thei a ni. 

Mei zuk nasat avang hian hormone calcitonin a tlem tial tial a, chumi awmzia chu - Thyroid (awr be) in calcitonin a siam chhuak a, chu chuan thisena calcium leh phosphate a buk tawk chiaha awm turin a pui a, mei zuk nasat erawh chuan a nih tur angin a thawk thei ta thin lo a ni.  

2. Rei tak thut : Awmna ngaiah rei tak i thut chuan i thawh dawnah i taksa a lo khawng ang a, din mai i harsatn thin ang. Chu chuan ruh tan harsatna a thlen thei tih a tichiang hle - computer hmaa rei tak tak thut te, phone khawihah che lo chang loa rei tak tak awm hian ruh tan harsatna a thlen thei tihna a nih chu. 
Rei tak tak thut hi ruh tan a tha lo a, kea vei kual thin bakah, taksa sawi zawi that a ngai a ni. 
3. Zu : Zu in hian taksaah nghawng tha lo hrang hrang a nei a, thihna hial a thlen thin. Zu in thin zingah ruh lama harsatna neihna chance a sang bik - zu hian kan taksaa testosterone leh estrogen a tihiam a, chu chuan harsatna a thlen ta thin a ni. 
A chunga tarlan bakah hian chi al ei tam lutuk zingah ruh natna hi a hluar bik tih miathiamte chuan an sawi bawk.