ZALEN April 29, 2025; ZALEN April 29, 2025; Mizoram Board of School Education (MBSE) chuan vawiin chhun dar 12 khan High School Leaving Certificate (HSLC) Examination 2025 result a tichhuak a, zirlai exam 18,946 zinga 14,527 an pass a, pass percentage 76.68 niin, nikum (73.37%) aiin an pass tha. HSLC 2024-ah hian a pumpuiah PC Lalthakimi d/o Darthuama, KD High School chu pakhatna a ni.

HSLC 2025 top 10-ah mi 24 awmin, zirlai exam zingah mipa aiin hmeichhia an tam a, pass zingah pawh mipa aiin hmeichhia 707 in an tam zawk.

Kumin HSLC Examination-ah hian exam hmachhawntu zirlai 18,946 zinga 18,603 chu regular student niin, 343 chu private-a exam an ni a; regular-a exam zingah 14,367 (77.23%) pass in, private candidate 343 zinga 160 (46.65%) an pass.

Zirlai pass zawng zawng 14,527-te chu hmeichhia 7,617 leh mipa 6,910 an ni a, pass percentage-ah hmeichhia 75.63% niin, mipa 77.86% a ni.

Distinction ah zirlai 1,343 pass in, first division-ah zirlai 3,763 an pass a, second division-ah 5,785 pass-in, third division-ah zirlai 3,636 an pass a, compartmental chance nei zirlai 64 an awm. Kumin hian zirlai 4,335 fail an awm.

Kumin HSLC exam-ah hian zirlai exam zawng zawng pass vekna sikul 107 a awm a, pass awm miah lohna sikul 13 a awm.

Tun hnaia HSLC Examination-a pass percentage zat chu 2024-ah 73.37%, 2023 ah 71.14%, 2022 ah 70.64%, 2021-ah 82.43%, 2020-ah 68.33%, 2019-ah 67.93%, 2018-ah 76.65%, 2017-ah 72.17%, 2016-ah 71.17%, 2015-ah 68.30%, 2014-ah 67.51%, 2013-ah 58.63%, 2012-ah 72.27% a ni.