HSLC Top 10 a tling School pariat atanga Mizo zirlai 22 te chawimawi

ZALEN May 7, 2025 : Mizo Zirlai Pawl (MZP) General Headquarters, Aizawl chuan vawiin khan High School Leaving Certificate (HSLC) Examination 2025 Top 10-a Mizo tlingte chawimawina hun Vanapa Hall-ah a buatsaih a, Home Minister K. Sapdanga chuan Khuallian niin hun a hmanpui.

K. Sapdanga chuan, Zirlai pass thar zawng zawngte in thiamna aiin in tumruhna a pawimawh chho dawn a, tumruhna nen hmalam pan turin ka fuih che u a ni a ti a. Zirlaite tan mahni tuina kawng thlân fimkhur a pawimawh hle a, chu chuan in hmakhua thui tak a hrilh dawn a ni a ti.

Khuallian chuan, "Mizo mipuite tuihalna leh rualawhna leh ramin tuna a mamawh ber chu All India Service-ah Mizo kan luh hi a ni a. Mizoten kum 10 chuang IAS Direct a inziak tling kan nei tawh lo a, IPS pawh kan neih lohna a rei tawh hle a. Mizo zirlaiten chonaah ngaiin All India Service-ah lut turin theihtawp lo chhuah rawh u a tiin a fuih a. District hrang hrangah Mizo D.C, Mizo S.P kan duh tih hi a ri ring hle a, chutiang dinhmuna ding thei Mizo kan tlem tawh hle a, duh mah ila dah tur an awm lo a ni. Mizo zirlaite lo chu he kan ram tuihalna chhawk thei an awm lo a ni," a ti bawk.

He hunah hian, MZP President H. Lalthianghlima chuan thu sawiin, MZP-in HSLC Top 10 a Mizo tlingte chawimawina a hlan thin chhan chu, Mizo zirlaite inkârah inelna thianghlim a awm theih nan a ni a ti a. Sawrkar enkawl sikul 13 laiin zirlai pass nei loin, 100% an fail hi ennawn turin sawrkar kan ngen a ni a ti bawk.

MZP President chuan, HSLC Result uluk taka kan en chuan Mipa aiin hmeichhia an tam zawk a. Mizo mipate kan tan nasat a ngai hle a ni a ti.

Vawiin HSLC 2024 Top 10-a Mizo tling chawimawite hi mipa 13 leh Hmeichhia 9 an ni a. Zirlaite hi chawimawina thuziak, topper cheng 10,000/-, 2na atanga 10na cheng sangnga 5,000/- theuh hlan an ni a. F. Vanlalrochana lehkhabu ziah 'Chhungril chakna' leh Lalhmachhuana Zofa lehkhabu ziah 'Mizoram GK Mini Edition' leh Duhthusam Ram Lehkhabute hlan an ni.

MZP chuan HSLC Top 10 a Mizo tlingte chawimawina hi kum 1995 aṭangin kumtin a buatsaih thin a. MZP inter HS Quiz a tel zirlai pang (5) te Top-10 ah hian an lang a ni.

MZP-in vawiina HSLC Top-10 chawimawina K.D High School, Govt. Mizo H.S, CLS Academy, St Joseph H.S.S., Mt. Carmel School, Greenland H.S.S., St. Paul's H.S.S. leh Baptist H.S.S., Serkawn atanga Mizo zirlai 22 a chawimawi te chu:-

1na. PC Lalthakimi

2na. Isak MS Dawngkima

2na. Malsawmkima Chawngthu

3na. Ricky Lalnunfela

4na. Stephen Vanlalrotluanga, Thomte

4na. Laldinpuii Renthlei

5na. Lalhruaitluanga

5na. C. Lalramtiama

6na. Lalruathlui

6na. Christopher Lalrinsanga

6na. H. Remsangliana

7na. V. Lalremruata