ZALEN April 6, 2025 : Indian Air Force (IAF) kuta Lengpui Airport hlan tura hmalakna a chawl rih nia thudawn a ni a, working committee pawhin draft memorandum of agreement (MoA) an la ennawn leh lo nia thudawn a ni.

ZALEN thudawn danin, ‘Working Committee to Look Into the Maintenance & Management of Lengpui Airport’-in IAF kuta airport hlan turin thui tak hma an la tawh a, draft MoA an siam chu an peih fel hunah cabinet a thehluh tur a ni.

Hetihlai hian working committee-in draft MoA an duan hi an la ennawn leh lo tih an chairman, TBC Lalvenchhunga chuan ZALEN a hrilh.

Tar lan tawh angin Working Committee to Look Into the Maintenance & Management of Lengpui Airport chu TBC Lalvenchhunga, MLA & Adviser to the Chief Minister, Mizoram (Finance & Planning) kaihhruaina hnuaiah November 18, 2024-ah din leh a ni a. Committee hi IAF hnena Lengpui Airport hlan chungchang zirchiang leh draft MoA buatsaih tura sawrkar din a ni.

Hetihlai hian March 15, 2025 khan NGO Co-ordination Comittee (NGOCC)-a tel pawl hrang hrang - Central YMA, MHIP leh MZP hruaituten Mizoram tlawha zin, Union Home Minister Amit Shah chu Raj Bhavan-ah an hmu a. Pawl hrang hrangte hian an ngaihpawimawh thil chi hrang hrang an sawipui.

An sawipui zingah chuan Lengpui Airport tihchangtlunna tur sum ruahmansak tur leh tichangtlunna tura ruahmanna siam turin an ngen a. Union home minister hian airport chu tihchangtlun a duh thu leh a ngaih pawimawh thu sawiin Airport Authority of India (AAI)-in a buaipui tur thu a lo sawi a. Thla thum chhungin AAI hian thil tul zawng zawng an buaipui ang a, thla ruk chhungin tihchangtlun hna an thawh tan tur thu a sawi.