ZALEN April 13, 2025 : Mizoram sawrkar hnathawk inzawmkhawm pawl, Federation of Mizoram Goverment Employees & Workers (FMGE&W) leh Blue Mountain Construction Engineering & Services Pvt. Ltd. tangkawpin Ainawn veng huam chhunga in leh lo nei lote chenna tura an ruahman, Federation Enclave sak hna chu thawh mek a niin September, 2027-ah chuan zawh hman tum a ni.

Chief Minister Lalduhoma’n February 19, 2025-a a hawn atangin luah duh tan booking hawn nghal a ni a, March thla tawp thleng khan mi 50 in luah turin an inziak lut tawh.

ZALEN-in he in sak buaipuitu, Blue Mountain Construction Engineering & Services Pvt. Ltd. Chairman Er. Parthapratim Phukan hnen atanga thu a dawn danin ruahman dan chuan Eederation Enclave-ah hian chhungkaw 344 tan chenna in siamsak an tum tih a sawi a. Chenna inte chu chi hrang hrang chi thumah thenin mut pindan (bed room) pahnih nei, pathum nei leh pali neite an ni dawn tih sawiin a man zat pawh a inang dawn lo niin a sawi bawk.

Er. Phukan chuan, “Enclave hi sawrkar hnathawkte tan ruahman deuh bik a nih angin CM-in booking a hawn (February 19, 2025) atanga kum khat chhung, February 19, 2026 thleng chu sawrkar hnathawkte tan chauh booking hi tih theih a ni dawn a, a hnuah mi dang tan hawn a ni ve dawn a ni,” a ti.

Enclave book duh tan hauh dan chi hnih a awm tih sawi bawkin, “A tira pe tla (cash down) leh an leina tur zat atanga 10% pe phawt a, a bak chu bank loan hmang rulh turin a tih theih a. A tira pawisa pe tla nghalte chu 10% discount kan pe a ni,” a ti.

Federation Enclave sakna atan hian company pawisa Rs. vaibelchhe 10 aia tam an seng tawh nia sawiin bank loan an beisei Rs. vbc 40 chu bank lamin an pe thei tep niin a sawi bawk.

Hmun dangah hetiang enclave sak an tum leh tum loh zawhna chhangin, “Pilot project atan tuna kan hmalakna hi zawh phawt tha kan ti a, Lunglei leh hmun dangah pawh kohna chu kan dawng nain tuna mi hi zawh phawt kan duh a ni,” a ti a. An sum khawih dan chu Real Estate Regulatory Authority enpuina hnuaia tih vek a nih avangin a him niin ZALEN a hrilh bawk.

Federation Enclave hi Mizorama a vawi khatna niin Mizoram sawrkar chuan kum 99 atan FMGE&W hnenah ram a pe a, FMGE&W leh Blue Mountain Construction Engineering & Services Pvt. Ltd. te hi thawhdun lehin chenna in sak hna hi thawh a ni.

Chhinchhiah danin Mizoramah sawrkar hnathawh mi 50,000 vel an awm a, an zinga 30,000 vel hi Aizawla cheng an ni a. Heng zinga 10,000 vel chauh mahni in leh loa khawsa an ni a, a bak hi mi inluah an ni.

Enclave-ah hian tui hnianghnar, 24hrs power supply, parking leh thil dangte awm tura ruahman a ni a. In leitute hian an luah duh lo anih pawhin midang hnenah an luah tir emaw an hralh leh thei dawn a ni.

Federation Enclave design-tu hi khawvel huap pawha lar leh hmingthang, Prof. Christopher Charles Benninger leh a hote an ni a. Mizo duh dan mila in hi design a niin AMC chuan chhawng 10 thleng sak phalna a pe a ni.