India-a hri lêng mekin Feb. 1-15 chhungin a vanglai thlen ring

Admin - Jan 09, 2022

R-naught an tih chu India ramah chawlhkar li chhunga a san ber lai a ni mek

Mi thiamten hripui leng inkai darh chak dan an chhutna, R-naught an tih chu India ramah chawlhkar li chhunga a san ber lai a ni mek a. IIT Madras-a mi thiamte chu February 1-15 vel hian a vang lai a tawng dawn niin an sawi.

R0 tia an sawi bawk thin hi hri kaiin mi dang a kai zat an sawina a ni a. 1 hnuai lam a nih chuan hripui leng chu a tawp tan tihna a ni thin.

IIT Madras-in computational model hmanga an chhut lawkna (preliminary analysis) atang chuan December 25 leh December 31 inkar khan 2.9 a ni thuak tih news agency PTI chuan a tar lang a. January 1 leh 6 inkar khan 4 a ni thung.

Dr Jayant Jha, Assistant Professor, Department of Mathematics, IIT Madras chuan R0 hi thil pathum - inkai theih dan, a kaiin mi a hnimhnaih zat leh inkai theih hun chhunga a innghah thu a sawi.

“Tunah hian inkhung hranna leh inkhuahkhirhna kalpui tan a ni a, hei hian a kaiin mi a tawh a titlem ang a, chu chuan R0 a tihhniam rin a ni,” a ti.

“Tuna kan chhut lawkna hi chawlhkar hnih liam taa dinhmun behchhan kha a ni a; mahse, hei pawh hi pun khawm leh inkhuahkhirhna dang kan zawm leh zawm lohvah a danglam leh duai thei,” a ti bawk.

Union health ministry chuan Nilaini khan India-ah hian coronavirus kai pun chak dan chu a rapthlak thu leh hei hi Omicron variant vang a nih theih thu a sawi a. R-naught value pawh 2.69 a nih thu leh thawh hnihnaa a vanglaia 1.69 aia a san hle thu a sawi bawk.

Jha chuan ministry-in an chhutna leh IIT Madras-in an chhutna chu an innghahna hun a inang lo tih a sawi.

Tuna an chhut danah chuan hri leng thawh kal mek hian February 1-15 inkarah a vanglai tawngin thawh hmasate ai mahin a na zawk dawn niin a sawi bawk.

Jha chuan hri leng thawh hmasa leh tuna thawh kal mek chu invenna pek leh mi dang hlata awm a tlem avangin a inang thei lo niin a sawi.

Hri leng thawh khatnaah kha chuan inkhuahkhirhna kalpui niin tunah erawh kalpui a tam ve loh avangin mi dang hlata awm a tlem hle niin a sawi.

“Hetih rual hian kan vanneihna chu ram mipui zahve dawnin invenna kan la tawh hi a ni,” a ti.

Preliminary analysis hi IIT Madras-a Department of Mathematics leh Centre of Excellence for Computational Mathematics & Data Science \angkawpin an neih a ni a. Prof Neelesh S Upadhye leh Prof S Sundar te kaihhruaina hnuaia an buaipui a ni.

Share now