Omicron variant-in khawvel a tihralkhelh mek lai leh India-ah pawh a kai hmuh an awm nual laiin, Indian-te zingah hmai tuamna ngaih pawimawh a la hlawh tawk lo zel a. Zirchiannaah mi pathum zela pakhat chuan an chhehvela chengten pawna an chhuahin hmai tuamna an keng lo niin an sawi.

Digital community based platform pakhat, LocalCircles-in April thlaa zirchianna an neih an tihchhuah tharah an zawhna chu India rama district 364-a mi 25,000 chuangin an chhang.

Zawhna chhangtu zinga 29% chauhvin hmai tuamna chu an ngai pawimawh bawk a. September thlaah an zawh lehah 12%-ah thla thlain November-ah phei chuan 2% chauh an ni tawh.

Vantlang zingah hmai tuam hian Covid-19 leng mek lakah mi a veng thei tih chu zirtirna kalpui a la ngai nasa hle a. Indian zinga pathuma pahnih zelin puana siam hmai tuamna an hmang a ni.

LocalCircles dintu, Sachin Taparia chuan, “Sorkar laipui, state sorkar leh district thuneituten Omicron variant a inlar tan mek lai hian mi tinin hmai an tuam theihna tura inzirtirna tha zawk an kalpui a tul hle a ni,” a ti.

In chhung phuiah mi pahnih awm dunin hmai tuam lo ve ve sela, pakhatin hri a kai chuan minute 10 lek chhungin a bula mi chu a kai thei a. Hmai an tuam nan N-95 mask an hmang ve ve a nih ngat chuan inkai turin darkar 600 chuang mah hun a ngai dawn niin Taparia chuan a sawi.