DOWNLOAD OUR APP

Read latest news on your phone
app-store

India-ah hri a darh tual tual

Mar 21, 2021

Mi 40,000 chuangin kai belh, Nov. 28 hnua tam ber ni

Coronavirus hripui leng mek chuan ram dang thenkhatte ang bawkin India-ah a zualkai leh mek a. Hri kai hmuh chhuah an pung chak leh a, damlo enkawl an pung mek zel bawk.

Darkar 24 liam ta chhungin India-ah hian hri kai mi 40,953 hmuh chhuah leh hman a ni a, hei hi November 29 hnu lama ni khata ram chhunga hri kai hmuh chhuah tam ber ni a ni leh tawh.

State thenkhatah chuan hri kai an tam zualna district thenkhatah sikul an khar a, inkhuahkhirhna an kalpui leh mek a, vantlang pun khawm theihna lam chi an khap leh tawh bawk.

India-ah hian mi 1,15,55,284 zetin hri hi an kai ta tih sorkar chhinchhiahnaah tar lan a ni.

Darkar 24 liam ta chhung hian India-ah hian mi 188-in an thihpui leh hman bawk a, mi 1,59,558-in an thihpui ta.

Maharashtra, Punjab, Kerala, Karnataka leh Gujarat te chu state panga zinga hri kai an tam zualna a ni.

India-ah hian ni thum chhung chu a zawnin mi 30,000 chuang hri kai hmuh chhuah a ni leh ta a. A hma ni chiahah khan mi 39,726-in an kai tih hmuh chhuah niin a pung hret hret zel.

Chawlhkar liam ta atang khan ni tin mi 20,000 aia tam hlir hri kai hmuh chhuah a ni leh ta ziah bawk.

Health ministry-in a tar lan dan chuan darkar 24 liam ta chhunga hri kai hmuh chhuah zinga 80.63% zet chu Maharashtra, Punjab, Karnataka, Gujarat leh Chhattisgarh state-a mite an ni.

India-ah hian hri kai an pun leh mek lai hian invenna damdawi pawh a rang thei ang bera kalpui mek zel a ni a, mi vaibelchhe li chuang hnenah pek a ni tawh. 

Share now