India ramah darkar 24 chhung khan Covid-19 kai hmuh chhuah thar mi 48,698 an awm a, a hma ni aiin 5.7%-in an tlem zawk.

Health ministry-in a chhinchhiah dan chuan darkar 24 chhung hian mi 1,183-in an thihpui leh hman a. Hri kai mi vaibelchhe 3.01 leh thihpui mi nuai 3.94 an awm tawh.

Coronavirus kai enkawl mek hi mi nuai ruk aiin an tlem tawh a, kumin April 1 hnua a tlem ber tum niin mi nuai 5.95 an la awm.
    Hri kai endik atanga hmuh chhuah zat bi, positivity rate pawh 2.79% niin a zawnin ni 19 chhungin 5% hnuai lam a ni tawh.

Darkar 24 chhung vek khan vaccine dose nuai 61.19 pek hman a ni a, hripui leng thawh thumna laka invenna atan sorkar laipuiin vaccine a tam thei ang ber pe chhuak turin tan a la chhunzawm mek.

January 16 atanga vaccine pek tanah hian dose vaibelchhe 31 pek a ni a. Ni khata pek tam ber tum chu June 21 kha niin dose nuai 90 pek a ni.

State 11 atangin Delta plus variant kai mi 48 an awm tawh niin Health ministry chuan a tar lang a. Maharashtra-ah mi 20 an awm a, Tamil Nadu-ah pakua leh Madhya Pradesh-ah pasarih an awm.

Maharshtra-ah hian Delta plus variant vanga thi an awm a, a hmasa ber a ni a. Hei vang hian district thuneitute chuan inkhuahkhirhna Level 3 kalpui turin ruahmanna an siam nghal. Madhya Pradesh-ah pawh thihpui an awm ve tawh bawk.

Mi thiamte chuan Delta plus variant vang hian chak zawka vaccine pek a tul tiin an sawi a. Dose khatna leh dose hnihna vaccine lak inkar pawh tihzim tul an ti.