Indian thahnem tak phurtu, France thlawhna tumhmuna mihringa sumdawnna a nih rinhlelhna avanga ni eng emaw zat dintir tawhte chu India-ah phurh thlen an ni ta.

A hranpaa hman (charter) Airbus A340 hi United Arab Emirates (UAE) atanga Nicaragua pan tur niin a tui thun tura a chawlh laiin rinhlelh a nih avangin thlawh chhuah zuitir a ni ta lo.

Mi 276 a phur a, naupang pahnih telin an zinga mi 25 erawh inhumhimna an dil avangin France-ah awm zuiin India panpui an ni lo.

Anmahni phurhnaa mawhphurtu (trafficker) nia rinhlelh mipa pahnih pawh France-ah hian chhui zui turin an la awm zui a; mahse, , court-in a chhuah zalen tawh thung.

Legend Airlines thlawhna hi Thawhlehni tukah khan Mumbai-ah a tum a ni.

News agency ANI-in thlalak a tihchhuahah chuan passenger eng emaw zat chu an tum hnuah Mumbai tumhmuna plastic chair-a an thu lai a lang a. An zinga thenkhat chuan tumhmun hi an chhuahsan a, an zinga tam zawk chuan thuthar lakhawmtute an kawm duh lo.

Thlawhna hi Ningania Paris atanga km 130 vela hla, Châlons-Vatry Airport a tum hnuah thuneituten an mi phurhte chu ‘mihringa sumdawnna kaihhnawih tuartu’ an ni mai thei tih thu a dawn avangin an thlawh chhuah leh an phal lo tih Parisian prosecutor-te chuan an sawi.

A chuang tam zawk hi Indian an ni a, UAE-a hna thawka awm an ni a. An zinga hmun thuma thenna hmun khat chu India khawthlang lama Gujarat-a cheng nia hriat an ni bawk.

French thuneitute chuan heng mite hi US emaw, Canada emawa luhpui tum, Nicaragua-a tumpui hmasak tur an ni thei niin an ngai a ni.

Thuneitute hian rinhlelh thil thu ringawt, engmah dan bawhchhiatna a awm hriat hauh lohva an thlawh chhuahtir zui phal loh chhan hriat a ni lo.

Thlawh chhuahtir an nih hnuah Nicaragua pan zui lova Mumbai panpui an nih zawk chhan pawh hriat a ni lo bawk.

Legend Airlines hi Romanian charter airline niin thlawhna pali an nei niin online flight tracker Flightradar chuan a tar lang.