India ramah namen loin Nokia phone a lo lar tawh thin a, Mizoramah ngei pawh ringtone inang hmang kan tam thin hle a nih kha. Hun rei tak chhung an reh hnuah neitu thar nen Nokia an inlar leh tawh a, tunah pawh Nokia XR20 chu India-ah tlangzarh turin ruahmanna siam a ni. 

Nokia XR20 hi July thla khan tlangzarh a lo ni tawh a, ram hrang hrangah hralh chhuah chhoh mek a ni. India-ah chuan October 20 atangin pre-order theih a ni dawn a, aman erawh a tlawm lem lo - Rs. 43,600/- vel atangin a intan tura ngaih a ni. 

Nokia XR20 hian Android 11, Snapdragon 480 SoC a hmang a, RAM pawh 6GB a ni. A battery erawh tun lai smartphone dangte aiin a hniam hret a, 4,630mAh a ni - wireless charging support a ni bawk. 

Dual rear camera 48-megapixel niin, 13-megapixel ultra-wide-angle sensor a chhawm bawk - SpeedWarp mode leh Action Cam mode bilhtel a ni hi mipui hiptu tur leh thlalak lama tui mite ngaihven hlawh zual tirtu a ni bawk.