India hian khawvel puma cheetah awm mek, 7,000 chuang zinga hmun thuma thena hmun khat chuang kawltu, South Africa leh Namibia atangin 20 lak luh a tum.

A lo thleng hmasa pariat zinga panga hi a nu niin a pa pathum an ni a, kum hnih atanga ruk inkar an ni a. Inrinni khan Windhoek, Namibia atangin Gwalior khawpui phurh thlen an ni.

Khawmualpui dang atanga phurh chhuah an nih avangin a buaipui pawh a hautak hle a. Mihirng phur thin, Boeing 747 thlawhna siam danglamah phurh niin ramsa lama mi thiam, veterinary doctor leh biologist pathumin kalkawngah an vil.

Gwalior atang hian helicopter-in Kuno National Park panpui an ni ang a, hetah hian Modi-a hovin ram hnuaiah chhuah an ni dawn a ni.

Mel 289-a zau, Kuno National Park-ah hian zawhte lian chi ei tur ramsa chi hrang hrang a awm sa hlawm a ni.

Ramhnuaia chhuah an nih hmaa khung hranna tur hmun pawh uluk taka duan a ni a, electric hungna siam a ni a, pindan intiat lo tak tak 10 a awm a, hetah hian khung an ni dawn.

Cheetah pakhat zel hi mahnia a vil tura inpe team pakhat zelin an vil dawn a, anni hian chevel zawng zawng an chhinchhiah vek ang a. Chhetah tinah hian satellite radio collar dah vek an ni a, hei hi an awmna hmun hriat zung zung theih nana tih a ni.

Sorkar pawhin kum 1952 hnua India-a awm tawh miah loa a puan, keite chi khat, cheetah chu ram chhungah a awm veleh tan ta.

Zawhte chi khat hi Prime Minister Narendra Modi-a piancham denchhenin Inrinni khan Namibia atangin pariat phurh thlen a ni.

Thla khat chhung khung hran an nih hnuah India lailia national park-ah chhuah an ni ang.

Cheetah hi tun hma chuan ram hnuaiah zawhte lian chi chi dang, sakei leh sakeibakneite nen an awmho thin a; mahse, kum 70 liam ta chhungin hmuh a ni tawh ngai lo.

Khawmuala cheng zingah chuan khawvela tlan chak ber ramsa hi darkar khata km 113 zeta chaka tlan thei a ni.

Tun tum hi khawmualpui dang atanga khawmualpui dang ram hnuaia khawsa tura sa ei chi ramsa sawn hmasak ber a ni.

Mi thiamte chuan India-a cheetah awm thinte an mang vek chhanah hian pelh nasat te, an khawsakna thin hmun tihchereu leh ei tur an van vang niin an ngai.

Zirtute chuan Britain-in India a awp lai khan cheetah 200 vel zet thah a ni tih an sawi a, a tam zawk hi kei leh beram vultute thah a ni.

Thenkhat erawh chu khuaah luta mihring leh an ran vulhte a laksak thin avanga thah an ni bawk a. Cheetah hi Britain rorelna hnuai atanga India a chhuah hnuah a chhuah ramsa lian mang awm chhun a la ni reng.

An mang hnu lawk atang khan India hian neih leh tumin a bei nasa hle a. Kum 1970 chhoah khan Iran atanga lak luh tumin indawrna pawh thui tak an kalpui tawh a; mahse, Shah of Iran kha a thuneihna paih thlak a nih zui tak avangin indawr chhunzawm a ni ta lo.

Cheetah hi ram chhungka an awm leh a nih chuan sum leh pai siam theihna a nih piah  lamah rannung dang nena inrintawnna pawh siam thain zawhte lian chi dang tan pawh a that beiseina a awm a ni.

Hetih rual hian an awmhmun sawna park-a chhuah hi cheetah tan a \ha lo hle nia sawi a awm tho bawk.

Cheetah hi an anpui zawhte lian dangte ang lo takin ramsa dangte tibuai ngai lo niin mi thiamte chuan an sawi a. India-a dahna tur, Madhya Pradesh-a Kuno National Park hi keite chi dang, leopard tamna hmun niin hengho hi cheetah no ei thin an ni lehzel bawk a, hlauhthawnna a awm phah bawk.

Hei bakah hian park pawn lamah vak chhuakin mihring leh ramsa dang an seh mai hlauhna a awm bawk.

Hetih lai hian thuneitute chuan cheetah hi an awmhmun thlak pawha insiam rem rang an ni tih an sawi a, an dahna tura an tihte pawh uluk taka zirin an chen mai theihna tur a nih bakah mihring nen pawha an intihbuai lohna tur hmun niin an sawi.

Hriat theih chinah khawvela cheetah chi siam thlahpawltir hmasak ber hi India-a tih niin Mughal emperor Jahangir-a hun laia mi tawh a ni.

A pa, Akbar-a pawh khan ro a rel lai khan cheetah 10,000 an awm niin a thu ziah pakhatah a tar lang nghe nghe a, ani hi kum 1556 leh 1605 inkara roreltu a ni.

A hnu zelah erawh India-ah hian cheetah awm zat hi a tlahniam chak hle a, kum zabi 19-na velah kha chuan za bawr chauh awm tawh anga ngaih a ni a. A mang ta hial a, kum 70 hnuah hmuh tur a awm leh dawn ta a ni.