India chuan thiam loh chantir chhan mumal tak awm lova a naval office hlui pariat lai thi tura Qatar-in a tih chungchang chu ngaihtuah tha leh turin a ngen.

Heng mipate hi Qatar-ah hian mi mal company-ah an thawk a, nikum khan ram enthlatu nia puhin man an ni.

Qatar leh India hian eng nge an hrem chhan tak erawh an la puang lo ve ve.

India external affairs ministry thupuangtu, Arindam Bagchi chuan India hian thuremna 'ngaihtuah tha leh turin' an thlen tawh tih a sawi.

Ministry chuan an consular pawhin Thawhlehni khan heng mite hi a be bawk niin a sawi.

Indian sorkar hian thla hmasaah tawh khan hremna an pek chuan 'a barakhaih hle' tih sawiin Qatari thuneitute hnenah pawh an thlen tih a sawi.

Foreign ministry chuan heng mite hi mi mal company pakhat, Al Dahra-ah thawkin Indian Navy-a tang thin an ni a. Nikum khan parliament-ah pawh Foreign Minister S Jaishankar chuan anmahni sawi nan hian 'ex-servicemen' tiin a sawi.

An zinga mi thenkhat chhungte pawhin an nihna leh an tun hma chanchinte pawh tual chhung chanchinbu thenkhat hnenah hrilhin navy-a an tan thin thu an sawi.

Nikum August-a man an nih khan India-ah chuan chanchinbu phek hma a luah a; mahse, a hnu zelah eng ang thubuai chiah nge awrhtir an nih tih hriat zuina a awm mang lo thung.

The Hindu chanchinbu chuan heng mite hi 'thuruk tawpkhawk an tidarh' nia puh an nih thu a tar lang a; mahse, khawi ram sorkar zawk zawk pawhin a ni a tihpui chuang lo ve ve.

Mi thiamte chuan he thil hian tun hnaiah ram pahnihte inkar pawh a tichhia niin an sawi a. December thla khan Jaishankar chuan parliament-ah sorkar chuan 'he thubuai khirh tak' chungchangah hian Qatar nen an indawr reng niin a sawi tawh thung.

Gulf ramah hian Indian maktaduai tel an cheng a, a tam ber hi hna sang lem lo leh hlawh pawh tha lem lo taka thawk an ni.

Heng mite hi Gulf Arab ram hausa tak taka an in sakna hmunah an thawk nasa a, hei hi India tan pawh sum hnar tha tak a ni ve tho bawk.