Indian Air Force officer pathumte chu Pakistan lam hawia missile an tihpuah palh avangin an hna atanga ban an ni. He thil hi kumin March thlaa thleng kha niin, an chungthu ngaihtuah a nih hnuah Thawhlehni khan ban an nih thu puan a ni ta a ni. 

Indian Air Force officer te hian kumin March thla khan Brahmos missile hi an tipuak a, missile hi Pakistan ram chhungah a  thlawk lut. He thil thleng avang hian ram pahnih inkarah innghirnghona a chhuak nghal a, an boruak pawh a tang hman hle. Brahmos missile hi nuclear keng thei cruise missile a ni a, India leh Russia ten an siam a ni. A thawkna hle ang tih chu a rinawm a, mahse a puah hmain Pakistan lamin an lo kapthla hman hlauh. 

Islamabad chuan Delhi chu fimkhur turin a chah nghal a, thleng nawn tawh lo turin a chah bawk. He thil thleng hi chhui zui nghal a ni a, tihpalh thila thleng ni mah se nunna atana hlauhawm leh ram pahnih inkar tichhe thei a nih avangin pawi khawitute hi ban an ni ta tho a ni. 

Pakistan Air Force chuan March 3 khan missile hi lei atanga feet 40,000 vela sangah ri aia a let thuma chakin Pakistan airspace chhung km 124 ah a thlawk lut tih an sawi a, leia a tlak hmain an kap thla a ni. He thil thleng avang hian India Defence Minister, Rajnath Singh pawhin ralthuamte chu uluk leh him taka enkawl a tul thu a lo sawi chhuak tawh a ni.