Tun tumah chuan India ram mi infiamna lama hmingthang leh ropui ber ber 10 kan en ho dawn a ni. An kawng zawh lamah chuan Indian infiammi te zingah pawh hian tawng sang ve tak tak an awm a, chung zinga infiamna chi hrang hranga tawng sang leh ropui zual bik an awm a, tun tuma kan rawn tarlan tur te pawh hian an tawng sang hlawm hle a ni. 

1) Major Dhyan Chand (Hockey)

Indian Hockey chungchang sawi tawh chuan mi tam zawk rilruah chuan India hockey khel thiam hmingthang Dhyan Chand a rawn lang nghalin a rinawm. A hming lema “The Wizard” leh “The Magician” an tih thin Dhyan Chand hi India ram tan kum 1926-1949 chhung kha Hockey khelin international match 185 khelah goal 570 a thun. Kum 1928 leh 1932 Olympic-ah khan India hockey team-ah telin Gold medal an hlawh chhuak ve ve a, 1936 Olympic-a an champion tum phei chuan India Hockey team captain a ni nghe nghe. India sorkar pawhin Dhyan Chand hi a dah pawimawh thiam hle a, amah chawimawina leh hriat reng nan a birthday August ni 29 chu “National Sports Day” -ah puangin hman thin a ni. A hming chawiin India rama sports award “Dhyan Chand award” lifetime achievement tia vuah chu award ngaihlut hlawh ber pakhat a ni. 

Hockey dawithiam ang hialin an ngai thin a, tum khat phei chu Netherlands ram a tournament an khelh tumin, tournament thuneitute chuan a tiang kawm (hockey stick) hman laiah chuan ball hip thei magnet a phum ru-ah ngaiin chutiang chu a awm leh awm loh endikin a tiang chu an titliah sak hial a ni.

2) Sachin Tendulkar (Cricket)

Tunge a nih sawi ngai lovin Sachin Tendulkar-a hi chu kan hre vek awm e. “Master Blaster” an tih mai hian India ram tan kum 1989-2013 chhung khelin, test bik hi vawi 200 chuang leh ODI vawi 463 leh T20I tum 1 a inlan. Cricket-ah hian world record ropui pahnih siamin Tests bikah run 15921 zet leh ODIs -ah run 18426 siamin khawvelah amah ang renga run siam tam hi an la awm lo. Batsman zinga ODI double century hlp chhuak thei hmasa ber a ni bawk. 

Sachin Tendulkar-a cricket thiamna leh a nungchang te chuan India ram thalai tam tak cricket khel turin phurna nasa tak a pe a, amah vang hian India ramin cricketer kan ngah phah hle a ni. Sachin Tendulkar hi 2014 khan India ram chawimawina sang ber “Bharat Ratna” hlan niin infiammi zinga dawng hmasa ber a ni bawk.

3) Leander Paes (Tennis)

Kum hi number mai a ni tih lantirtu pakhat chu 2014 kuma Padma Bhushan award dawngtu Leander Paes hi a ni ngei ang. Kum 46 a nih thlengin tennis khawvel-ah ala ropui em em a, 2021 Olympic khan Leander Paes hian tennis a chawlsan chauh a ni. 1991 a tang khan Leander Paes hian international level tennis a khel tan a, 1996 Olympic-a Men's single Bronze medal a lak kha fans leh mipui nawlpui hmelhriat tanna a ni awm e. Singles hi a khel tam lutuk lo va, 1997 US Open-a 3rd round a lut kha single bikah chuan a tawn san ber a ni. Leander Paes chu doubles lamah inletin Men’s doubles leh Mixed doubles a khel thin a, Grand slam title pawh a la nual ta reng a. 

Men's Doubles-ah Indian ve tho Mahesh Bhupathi-a nen an inkawp a, 1999 leh 2001 French Open bakah 1999 Wimbledon-ah te an champion a, Martin Damm nen 2006 US Open an champion bawk. Lukas Dlouhy nen 2009 French Open leh US Open khan an champion bawk. 2012 Australian open leh 2013 US Open chu Radek Stepanek-a nen an champion leh bawk.

Mixed doubles bikah hian Lisa Raymond-i nen 1999 Wimbledon an champion a, 2003 Australian open leh Wimbledon chu Martina Navaratilova nen nomawi an hawn a, kum 2008 US Open, 2010 Australian Open leh Wimbledon chu Cara Black kawpin a champion pui leh bawk. Martina Hingis kawp thar lehin a ni nen hian 2015 Australian open, Wimbledon, US Open leh 2016 French Open an champion leh a ni.

4) PV Sindhu (Badminton)

He list zinga naupang ber PV Sindhu hi 2016 Olympic-a silver medal a dawn atangin mi tam zawk chuan kan hmelhriat tan a, PV Sindhu-i ropuina leh pakhat chu 2019 World championship-a Women’s singles a champion leh Commonwealth Games 2018-a Mixed team category-a gold an la kha a ni awm e. Kum 2013 atang khan PV Sindhu hian world championship a tel ve naah chuan medal a hlawh chhuak deuh zel. Sindhu hi Zhang Ning hnua world championship medal 5 chuang awrh thei hmasa ber a ni. 

BWF Superseries-ah gold medal tum 3 a hlawh chhuak a, BWF Grand Prix bikah tum 6 Gold medallist a ni tawh bawk. PV Sindhu hi kum 2020 khan Padma Bhushan award hlan a ni. 

5) Vishwanathan Anand (Chess)

Vishwanathan Anand hi Chess-ah kum 2000, 2007, 2008, 2010 leh 2012 khan World champion a ni a, 1987 khan Indian zinga World Junior Chess Championship-a champion thei hmasa ber a ni a, 1988-ah Shakti Finance International chess tournament-ah a champion a, Indian zinga Grandmaster Champion thei hmasa ber a ni bawk. 

Vishawanathan Anand-a hi khawvel chess player 13 Elo rating, 2800 chuang nei thei zingah tel phakin a ranking san lai berin 2817 a han hawlh a, Chess history-a ranking sang 8-na a ni phak bawk. World Rapid Chess Championship-ah 2003 leh 2017 khan a champion bawk. Khel Ratna award dawng hmasa ber niin kum 1992 khan a dawng a, India civilian chawimawina sang ber dawttu Padma Vibhushan chu 2007 khan hlan a ni bawk.

Top 10 zinga lang midang 5 te chu 

6) Sushil Kumar (Wrestling)
7) Abhinav Bindra (Shooting)
8) Milkha Singh (Athletics)
9) Mary Kom (Boxing)
10) Narain Karthikeyan (Formula 1)