Qatar-a India palai chuan naval officer hlui mipa pariat, Qatar-a an puhna chiah hriat lohva thi tura hremna pekte chu a kawm.

Indian foreign ministry thupuangtu chuan palai hian lung inah December 3 khan a bia niin a puang.

Qatar court chuan India-in heng mite hremna ngaihtuah tha leh tura a thlen chu vawi hnih a ngaihtuah tawh a, a vawi thumna tur ngaihtuah leh a hmabak mek niin ministry hian a puang bawk.

Court of First Instance of Qatar hian heng mite hi October thla khan thi turin a hrem a ni.

India chuan he thil hian 'a barakhaih hle' tih sawiin dan hmanga a tih theih ang anga bawhzui an tum tih a puang nghal.

Court thuremna hi vantlangah puan a ni lo va, ram pahnih pawh hian thiam loh an channa chhan chiah hi an sawi lo bawk a. Financial Times chanchinbu chuan mi pakhat, a hming tar lan loh hnen atanga an hriat dan nia an sawi an tar lanah chuan heng mite hi 'Israel tana enthlak hna thawktu' nia puh an ni.

Indian foreign ministry thupuangtu, Arindam Bagchi chuan Ningania thuthar lakhawmtute a kawmnaah court thuremna hi 'confidential' a nih thu leh 'dam thiamte hnenah chauh hrilh' a ni tih a sawi a. Mite chu hetiang thubuai khirhah hian 'titi leng vak lo siam lo turin' a ngen bawk.

Indian palaiin a hmuh hma ni hnihah khan Prime Minister Narendra Modi chuan Dubai-a COP28 summit a chhim rualin Qatar Emir, Sheikh Tamim bin Hamad Al Thani a hmu a. Modi hian a hnuah hruaitu pahnihte hian thil hrang hrang an sawi zuiah 'Qatar-a Indian awmte himna tur' pawh an sawi tih X-ah a tar lang.

Indian sorkar chuan mipa pariatte hi mi mal company, Al Dahra-a thawk an ni a; mahse, Indian Navy-a lo tang thin nia sawi an ni ber a. Nikum khan parliament-ah Foreign Minister S Jaishankar chuan 'ex-servicemen' tiin a lo sawi tawh a. An zinga thenkhat chhungte pawhin tual chhung chanchinbuah Navy-a lo tang tawh an ni hlawm tih a sawi.

Nikum August-a man kha niin India-ah chuan chanchinbu tin a luah a; mahse, an thubuai awrh ber engmah hriat chian a awm lo.

Qatar-ah hian Indian 7,00,000 vel an awm a, ram inkungkaihna pawh a tha hle a. Tun tum thil thleng hi mi tam tak chuan India-in an inkawmngeih danah eng rilru chiah nge a put tih hriatna tha tak turah an ngai.