Kartawpa Indonesia-a Marapi tlangkang inphuh chhuak thar avangin kea khawchuana zin khawthawng (hiker) 11 an thi niin chhanchhuah hna thawktuten an sawi.

Thawhtanni khan mi pathum chhanchhuah an ni a. Mi dang 12 chin hriat lohva awmte zawn mek ni mah se tenau deuhva tlangkang inphuh chhuak a awm avangin chawlhsan leh rih a ni.

Tlangkang a inphuh chhuah lai hian heng lai velah hian hiker 75 an awm mek a; mahse, a tam zawk chu hmun himah sawn chhuah hman an ni.

Mount Marapi hi Indonesia-a tlang la kang mek 127 zinga pakhat niin Pathianni khan km thum zeta sangin a vap leh khu a inphuh chhuak thar a ni.

Thuneitute chuan inralrinna sang ber dawt an khawng nghal a, mi chengte chu a inphuh chhuahna lai (crater) atanga km thum bialah kal miah lo turin an ti.

Crater bul hnai lawk atanga chhanchhuah mi pathum chu ‘an chauvin an kang nual’ niin Padang Search & Rescue Agency hotu, Abdul Malik chuan a sawi a. Thawhtanni zingah khan tlang lawn mi 49 chu hmun himah sawn chhuah an ni bawk a, thenkhat chu an kang nual bawk.

Pathiannia a inphuh chhuah lai video tihdarhah chuan chhum chhah tak, meivap khu tam tak van lamah a invawrh chhuak a, khawlaia lirthei leh kawngpui pawh meivapin a bawh khat vek.

Chhanchhuah hna thawktuten ruang leh hliam tuarte chu tlang chhengchhe tak atangin tlang bulthuta ambulance-in a nghahna hmunah an hruai thla lai a lang bawk.

“A sat lutuk avangin mi thenkhat chu an kang nasa hle a, damdawi inah hruai an ni,” tiin West Sumatra Disaster Mitigation Agency hotu, Rudy Rinaldi chuan a sawi.

Tual chhunga mi zawn leh chhanchhuah hna thawktu thupuangtu, Jodi Haryawan chuan mi dang zawn zel nan ‘a hlauhawm rih lutuk’ niin thuthar lakhawmtute hnenah a sawi.

Mount Marapi hi metre 2,891-a sang niin Indonesia-a khawthlangtawp, Sumatra thliarkara awm a ni.

Indonesian archipelago (tliarkar tereuh tete awm khawm) hi Pacific Ring of Fire tih a ni a, continental plate intawhna lai a nih avangin tlangkang leh lirnghing a awm duhna lai hmun a ni.