Power & Electricity Department chuan tun hnaia veng thenkhata inên chhawk ngai thin tihtawp tumin theihtawp an chhuak mek.

Ningani khan power department hian thuchhuah siamin kumin thlasik a nat zual avangin miin intihlumna hmanrua an hmang nasa a, hei hi electric line leh transformer an hman mekten a zawh loh thin avangin inên chhawk a ngai thin tih an tar lang.

Inen chhawk ngai hi tihtawp a nih theih nan hma an la mek niin an insawi a. Phai atanga power supply hmuhna pakhat, Luangmual Sub-Station incoming line-ah hian 70MW pelh phal a nih ngai loh avangin thlasikah peak load laiin load inên chhawk a ngai thin tih sawiin, “Power tam zawka lak luh a nih theihna turin conductor lian zawka thlak mek a ni,” an ti.

Tlangnuam Sub-Station-a overload vanga transformer lian atang pek chhuah inên chhawk ngai thin pawh a tihtawp nan transformer lian dang dah belh mek a nih thu a tar lang.

Chawnpui Sub-Station-a transformer lian overload chhawk turin Maumual Sub-station atangin transformer tê (DT) thenkhat chawm then tum a ni bawk tih sawiin, “Heng hnate hi January thla chhungin thawh zawh a ni ang,” an ti.

Inên chhawk hi tun hnaiah Aizawlah a tam hle a, mipui pawh an phun tan a. Nilaini zan maiah khan veng thenkhatah chuan vawi hnih, vawi thum êng nei lo hman pawh an awm a ni.

Department hian power ren turin mipui an ngen nawn a, hmasawnna hnathawh chhung hrethiam turin an ngen bawk.