Aizawl: April ni 20,2021 atanga Aizawl khawpui leh district khawpui ah te inkhuahkhirhna khauh zawk kalpui anih hnuah coronavirus hrikai hmuh chhuah zat a tlahniam hret hret a. Inkhuahkhirhna hi naktuk zing dar 4 a tawp tur ni mah se, Covid-19 Medical Operational (MOT) team chuan kar khat dang pawhsei leh an rawt. 

Mizoram a inkhuahkhirhna kalpui tan hma ni chiah, April 19 khan hrikai mi 91 hmuh chhuah an ni a. Inkhuahkhirhna kalpui tan a nih khan mi 90-in an kai tih hmuh chhuah a ni a, April 21 khan mi 73-in an kai tih hmuh chhuah a ni a, April ni 22 khan mi 62 hmuh chhuah leh an ni a, nimin zinga result tihchhuahah Mizoram a sample 1992 endik atangin COVID-19 positive thar 63 hmuhchhuah leh an ni. April ni 23,2021 khan ZMC RT-PCR Laboratory-a sample test 720 zingah COVID-19 positive 32 hmuhchhuah an ni a. TrueNAT Laboratory-a sample test 90 zingah positive 2 an awm a. Rapid Antigen Test hmanga sample test 1182 zingah COVID-19 positive hmuhchhuah thar 29 an awm bawk. Tun dinhmunah Mizoramah Covid-19 hri kai 5283 an awm tawh a, 4627 an dam tawh a, 12 in an thih phah tawh a, tuna vei mek 644 an ni. Mizorama Covid-19 hrikai enkawl dam zat chu 87.58% a ni mek.

Health Minister thurawn angin Zirtawpni khan Covid 19 Medical Operational Team chu an Chairman Dr ZR Thiamsanga office-ah an thukhawm a, Mizorama Covid 19 hri leng hluar chho leh mek avanga inkhuahkhirhna kalpui mek leh hri leng laka Mizoram dinhmun thlir in, hrikai thar hmuh chhuah a la tlak hniam hleih theih loh bakah tualchhungah hri a darh nasat tawh avangin hri laka Mizoram a him a, mihring nunna chhan nan, kar khat tal inkhuahkhirhna kalpui leh nise an ti a, he an duhdan hi April ni 25-a state level committee thutkhawm neih tura ngaihtuah turin rawtna an thlen dawn a ni. Medical Operational Team ah hian Chairman Dr ZR Thiamsanga bakah Health Secretary R.Lalramnghaka, Indian Medical Association Mizoram State Branch aiawhte, Mizoram Government Doctors' Association aiawh leh Non-Governmental Hospital Association of Mizoram (NGHAM) aiawh te an tel a ni.