Aizawl; Election Commission of India (ECI) in Serchhip by-election neih hun tur a bithliah chu he thu buatsaih lai thlengin tihdanglam a la awm lo a. Hetihlai hian Seventh-day Adventist Church a Executive secretary Lalnilawma Colney chuan vote thlak hun tihdanglam a nih loh chuan an member te'n Ni tlak hma chuan vote an thlak loh mai dawn thu an sawi. 

ZALEN zawhna chhangin Mizoram Jt. Chief Electoral Officer (CEO) David L. Pachuau chuan Serchhip bial by-election neih hun tur chungchangah Election Commission of India (ECI) atangin thuthar hriat an la neih loh thu sawiin, ECI thu an nghah rih thu a sawi.

Vote thlak ni tura ruahman (April 17), Inrinni a nih chungchang ah Seventh-day Adventist Church-a Executive secretary Lalnilawma Colney chuan inthlan hun sawn tura an ngenna chu a hlawhtlin ngei an rin thu leh a lo hlawhtling lo a nih chuan an kohhran mite chuan vote an thlak loh mai dawn thu sawiin, ni tlak hnu a thlak theih a nih erawh chuan chumi hun chu an nghah mai tur thu a sawi.

ECI ruahmannain Mizorama Election office chuan Mizoram pum an member zat leh Serchhip contituency chhung a member an neih zat an zawtin an chhang tawh niin a sawi bawk a ni.

Vote chhiar hun tur a ruat, May 2 (Pathianni) chu Mizoram Synod chuan an duh loh thu an lo sawi tawh a, hemi chung changah hian Moderator Rev. Dr. C. Lalhlira chuan inthlan buatsaihna atan hun dang a tam tih ZALEN a hrilh.