Aizawl October 17, 2022: ZPM chhung inkhawmah Working President K Sapdanga chuan, “Inthlan tibawlhhlawhtu pakhat chu dahkham politics hi a ni, Mi thenkhat chuan Politics hi gambling atan an hmang thiam em em a, eng party-ah mah an buai ve lo,” a ti.

K Sapdanga chuan, “Inthlan tibawlhhlawhtu pakhat chu dahkham politics hi a ni a. Mi thenkhat chuan Politics hi gambling atan an hmang thiam em em a, eng party-ah mah an buai ve lo. Pawl hrang hrangah maktaduai tel an dahkham thluah thin a. Hetianga thangkam ching zinga tam tak chu state pawn lam mi an ni nghe nghe. Tu pawl pawh lo sawrkar se, leiba thin tur an nei vek a, contract, supply hna zawngin an inrulhtir thin. Heng dahkham politics rulh nan hian mipui pek tur chhiah tihpun a ngai a, a tuartu chu mipuite tho kan ni. Hei pawh hi do rem dan kawng awmchhun chu, chutiang mi thurualpuitute vote hmanga thenfai a ni,” a ti.

Sum ngainat a hlauhawm zia sawiin, “Thluaka sum lut hlauhawmzia hi Kohhran lam platform atangin kan zir tawh a, mipuite pawh kan chiang thawkhat viau tawh awm e. Thuneihtute berin mipui sum (public money) an it tlat si chuan, pawn lam atanga khap beh chu a har khawp mai. Dodal dan awmchhun chu vote hmanga chawlhtir hi a ni deuh mai awm e. CBI te, Judiciary te pawh kan han thlamuanpui dawn thin a, cheng vaibelchhe kua thubuai chinfel tak mai dan te khan min tihthaih a, kan thla a muang zo ta meuh lo a ni. Kan hmachhuan awmchhun chu vote thiltihtheihna hi a ni ta ber mai. Mi mangang zawng zawngte vote hmang tangkai turin kan sawm mawlh mawlh a ni,” a ti bawk.

ZPM Working President chuan, “Kum 2023-a MLA inthlan hunah chuan, Congress party leh ZPM party-te thawkho tur angin an lo sawi palh thin a. Hetiang thawhho tum thu hi, party pahnihte hian eng level-ah mah kan la sawi si lo a, tumna pawh a awm hek lo. Chuvangin, mipuite hruai sual palh thei a ni dawnin kan hria a, khawngaiha lo sawi tawh lo hram turin media hmangin kan ngen tawh a, kan ngenna pawh an ngai pawimawh a, tunah chuan an sawi chhunzawm tawh lo niin kan hria a, kan ngenna min zahsak a, min zawmsak avangin an chungah kan lawm takzet bawk a ni. A lo ri leh palh a nih pawhin, thahnemngai falte duhthusam mai a ni tih lo hrethiam turin mipuite kan ngen a ni,” a ti bawk.