Congress party chhunga thutlukna tawp siam theitu, Congress Working Committee (CWC) chu Pathianni tlai dar 4:00 hian an thukhawm dawn a. Ni thum liam taa state inthlana an tlawm hnuah thutkhawm pawimawh hi neiin September thlaa an party hruaitu thar inthlan tur chu sawn hma hial an ngaihtuah dawn.

Congress hi Ningania state panga inthlan result chhuak taah an che chhe hle a, Punjab-a ro an relna pawh Aam Aadmi Party (AAP) lakah chânin state dang pathum - Uttarakhand, Goa leh Manipur-a sorkarna chan leh theih an inbeiseina pawh engmah lovah a chang bawk.

Party chief Sonia Gandhi fanu, an hruaitu hlun Rahul Gandhi farnu ni bawk, Priyanka Gandhi Vadra-i hova nasa taka an campaign-na, Uttar Pradesh-ah pawh Congress hian bial 403 awmah bial hnih chiah an la phak a, inthlan hnuhnung bera MLA panga an neih pawh an phak ta lo va. Vote tla  zawng zawng atanga 2.4% chiah an chang phak.

Chiang taka an tlinloh hlawm avang hian Gandhi chhungkaw kaihhruaina hnuaia kal chu an party mi tam takin an sawisel tawh a. An hruaitu langsar zingah ngei pawh insiksawi duhna thawm a ri a, kum hnih kal taa an hruaitu hlun mi 23, ‘G-23’ an tihten Sonia Gandhi hnena lehkha thawna insiam that an mamawh thu an thlen pawhin thawm a neih rin phah leh hle tawh.

“Engmah insiam thatna a thleng dawn chuang lo,” tiin Congress hruaitu lawk pakhat, Gandhi chhungkaw kaihhruai duh lotu, a hming tar lan duh lo chuan a sawi.

G-23 an tih zingah tel, Congress hruaitu hlun, Shashi Tharoor pawhin Ningania vote tla result a chian hnu lawkah an party chuan inthlak ngei ngei an ngai tih Twitter-ah a tar lang a. An zinga mi tho, Jaiveer Shergill pawhin insiam thar an ngaih thu leh an chak lohna chu tangkai lo taka hman chi rual a ni tawh lo tih a sawi.

Party hruaitu lawkte duhkhawm lotu zinga thenkhat chu Zirtawpni zan khan an hruaitu hlun, Ghulam Nabi Azad-a inah an thukhawm tawh a, kal zel dan tur an sawiho va, an hruaituten intihnun thar leh dan tur an ngaihtuah lo niin an sawi hlawm.

Assam, West Bengal, Kerala leh Puducherry inthlana an chak loh chhan zir chiangtu committee an dinin  report an siam an sawiho ta miah lo pawh tha an tih loh thu an sawi hlawm bawk.