ZALEN, April 06, 2025: Tuikhuahtlang YMA, Aizawl chuan Pathianni tuka Dawrpuia Dawrpui, Aizawl bula an veng pa vihna thleng anga thu dik tawk lo darh chungchangah Mizoram mipui leh police chungah thupha an chawi.

Pathianni tlaia Tuikhuahtlang YMA-in thuchhuah an siamah chuan zing dar 04:00 vela invihna thleng anga thu leng chungchangah thu an dawng a, mi parukin chema an vih thu leh heng mite hian silai an ken bakah Mizo tawng an pai nia an thu dawn thu an sawi a. Hma la nghalin hliam tuarte thlavang hauhin Aizawl Police Station-ah an hruaitute pawh kal nghal tih an sawi.

Police-in he thil thleng hi an chhui hnuah invihna hi thil tak tak ni lo, hliam tuarin dawt phuaha a chhungte bulah thu dik lo a hrilh a ni tih hriat a nih thu leh a hliam hi bike-a a chetsualna a nih zawk thu finfiah a ni tih an tar lang a. Thu dik lo sawitu hi thubuai siamsakin police hian an man nghal bawk tih an sawi.

Tuikhuahtlang YMA chuan he thil thleng hian an veng bakah Mizoram mipui a tithlabar a, police pawh a tibuai hman hle nia sawiin “Hengte avang hian branch YMA chuan pawi a tiin thu dik zawk puan chhuah tulin a hria a, thu dik tawk lo thu leng avang hian Zoram mipui leh a bik takin Mizoram Police chungah thupha kan chawi tak meuh meuh a ni,” an ti.