Ebrahim Raisi chu Iran ram president thar a ni dawn ta a, inthlana vote tlate chhiar tawh chinah a khingpuiten an phak thei tawh lo.

Inthlan hi chuhtu dang pathum an awm a, heng mite hi inthlana ding thei lo tura tih sa an ni hlawm nghe nghe.

Raisi-a hi Iran-ah chuan an judge sang ber niin a thil thlir danah a duh firin an ram thatna tur nia ngaihah chuan a kal nasa hle a. United States pawhin a hrek lai niin tun hma chuan politics thila mi mante tihhlumna lamah pawh inhnamhnawihna a nei nual.

Iran-ah hian an president hi nihna sang ber dawttu a ni a, supreme leader chiah a phak lo.

President hian ram chhunga thil kalpui danah leh ram pawn lama chet velnaah thui tak thuneihna a nei a. Hetih rual hian an politics kalphungah hian an supreme leader, Ayatollah Ali Khamenei hi sakhaw lama an hotu ber a ni a, sakhaw lam mah ni se thil hrang hranga thutawp siamtu a ni thung.

Iran hi sakhaw la run tak mai an ni a, kum 1979-a Islamic Revolution a thlen hnuah phei kha chuan a nsa zualin sakhaw zalenna a awm mang lo va. Iranian tam tak chuan tun inthlan pawh hi Raisi-a a tlinna tura thil engkim ruahman saah puhin inthlanah pawh an ring an rawlh duh lo.

Raisi-a hian an rama hna nei lo tam lutuk tihtlem leh US-in an ram a hrekna tihtawp tura hmalak a tiam a. US-in a hrekna hi Iranian-ten an tuar nasa tak zet a ni.

Khawthlang lam ramte hian Raisi leh Supreme Leader Khamenei hi nuclear ralthuam siamna lamah ringhlel hle mah se anni pahnih hi chuan inremna siam theih an inbeisei.