Israel leh Hamas chuan inkahhai an kalpui mek a tawp hma chiahin ni khat dang an pawt sei leh.

Inkahhai hi a ni sarihna atan an pawt sei leh dawn ta a, India rama Ningani chawhma dar 10:30-a an hman lai a tawp hma chiahin Qatar palainain pawh sei a ni.

A hmaa an kalpui tawh tho angin hetih chhung hian Hamas-ten mi an hren mek an chhuah ang a, Israel-in Palestinian an mante an chhuah ang a, Gaza-ah puihna tam zawk thawn luh a ni ang.

Nilaini zan khan Hamas hian an mi hren zinga 16 an chhuah belh leh a, Israel-in Palestinian 30 an chhuah bawk.

Ni ruk chhung hian Israeli hren 102 an chhuah an ni tawh a, Palestinian 210 chhuah an ni bawk a. Hamas hian Israeli 140 chuang an la hreng mek.

Israel sipai chuan inkahhai hi ‘palai hna thawktute kaltlangin, mi hrente chhuah an nih zel theih nan leh thil kal zel dan tur atan ruahmanna siamin’ an pawm tih an sawi.

Prime minister pisa pawhin inkahhai pawt sei hi a puang tawh a, hmeichhia leh naupang hren chhuah tur list pawh a dawng tawh a, engzat nge an nih tih erawh hriat a ni lo va. Hamas pawhin ‘a ni sarih nan pawh sei leh’ a nih thu an puang a, a bak an sawi thui lo thung.

Inkahhai hi a tirah ni li chhung atan puan a ni a, vawi hnih pawh sei a ni ta.

Inremna siam tura indawr a nih lai khan Israel chuan mi hren 10 chhuah zelah ni khat dang inkahhai pawh sei an inhuam tih an lo sawi tawh.

US Secretary of State Antony Blinken chuan inremna chu ‘a lawmawm’ a tih thu a sawi a, chhunzawm zel chi a nih thu a sawi bawk.

“Kar liam ta chhungin hmasawnna duhawm tak awmin mi hrente an lo haw a, an chhungte an inhmu leh ta hlawm a ni,” tiin Israeli President Isaac Herzog pawhin Ningania Tel Aviv-a an thutkhawmnaah a sawi.

“Puih ngai tak tak, Gaza-a nunau pawisawi lote pawh tam zawkin puih theih an nih phah bawk,” a ti.

Hetih lai hian Nilaini khan Israel Prime Minister Benjamin Netanyahu chuan a hmaa a sawi tawh tho, inkahhai a zawh veleh indona chu an kalpui leh tur thu a sawi nawn leh.

“A tawp thlen hma chu kan bei zel ang. Chu chu ka policy a ni a, cabinet-te pawhin min thlawp vek a, sorkarin min thlawp a, sipaite pawhin min thlawp a. Chu chu kan tih ngei tur pawh a ni,” a ti.

Inkahhai pawh sei a nih hma khan United Nations Secretary General Antonio Guterres chuan Gaza Strip-a chengte hi an dinhmun a chhe tak zet tih a sawi.

Inkahhai pawh sei chu thil lawmawm tak a nih rualin, ‘nunau mangangte puala inkahhai’ chu a tul tak zet tih a sawi.

UN chuan chawlhkar sarih liam ta chhung khan Gaza-a cheng mi maktaduai 1.8 chuangin an chenna in leh lo an tlanchhiatsan niin a sawi a. Heng zinga 60% chuang chu UN hnuaia Palestinian raltlante buaipuitu pawl, Unrwa hmun 156-ah an khawsa.

Kar tir lam khan World Health Organization thupuangtu, Dr Margaret Harris chuan heng tlanchhiate zingah hian natna a len a hlauhawm tak zet tih a sawi a. Naupang kum nga leh a chung lamten khawthalo an vei theihna remchang chu a nih dan pangngai aiin a let 100 chuangin a tam zawk niin a sawi.

Hamas hian October 7 khan ramri kânin Israel chhim lam an bei a, mi 1,200 vel thatin mi tam tak an man nghal a. Hemi chhang let hian Israel chuan thlawhnaa a beih hnuah lei lamah sipai a tir lut zui a, hei hi inkahhai puanah a chawlhsan rih.

Israel-in thlawhna leh lei lama a beihna avang hian Gaza-ah mi 15,000 chuang an thi tawh a, heng zinga 40% zet hi naupang niin Hamas enkawl Gaza Strip-a health ministry thuneiten an sawi a. Strip hmar lam hi chu an chhu chhe deuh vek tawh a ni.