Hamas commander lawk, Israel ram chhunga Kibbutz Nirim an suasamnaa mawhphurtu bera an puh chu Pathiannia Israeli thlawhnaten an kap hlum niin Israel Air Force (IAF)-in thuchhuah an siamah an tar lang.  

Israeli intelligent-ten Billal Al Kedra-a awmna lai, Gaza Strip chhim lama Khan Yunis hi an hre fuh a. Amah hi Hamas sipai pawl, Izz ad-Din al-Qassam Brigades hnuaia tuipui lama che thin bik, Nukhba force an tiha commander a ni.

IAF chuan Al Kedra an beihnaah hian Hamas leh Islamic Jihad firfiak dang pawh an that tel niin an sawi bawk.

Israeli sipaite hianthlawhna hmangin Zaytun, Khan Yunis leh Jabaliya khawthlang lam hmun 100 chuangah Hamas operational command centres leh sipai hmun an kap a. Anti-tank missile launch pad leh an khawthlirna hmun tam tak an tihchhiatsak. 

Tar lan tawh angin Inrinni hmasa khan Hamas-ho hi khawmual leh tuipui atangin paraglider, lawngleng leh kein Israel an lut a. Gaza ramri atanga mel khat pawh tling lo, Israel-te inbenbelna, kibbutz pakhat, Nirrim chu bitumin a mi chengte leh an thil neih nasa takin an suasam.

Ramria Nirim leh a chhehvela lo neia ei zawngte awmna hmun tam tak chu Hamas hian rocket nen an bei a. Mi chengte hi pindan him an siamah an tlan lut a, rhenkhat an mut lai a ni.

Israeli thuneitute chuan Hamas-ten heng hmun an beihnaah hian mi tam tak an that tih an sawi.

Inrinni khan Israeli-ten Gaza City an kahnaah Hamas sipai commander hlun tak, an pawlin vansang lam atanga mi an beihna kawnga kaihruaitu an that bawk a. Murad Abu Murad-a hi Hamas-ho operational centre an kahnaah a thi tel niin an sawi.