Palestinian hel pawl, Hamas-ten rin lawk loh takin Inrinni tukah Israel an bei thut a, Gaza Strip bul hnaia Israeli-te chenna hmun hrang hrangah lutin mi za tel an that a, mi thahnem tak manin an la hreng mek bawk.

Khawvelin a ngaihven thil thleng mekah hian he hel pawl hian eng nge an tih, engvangin hetiang taka an chet?

Engnge Hamas chu?

Hamas hi Palestinian hel pawl, Gaza Strip-a rorel mektute an ni a. An hming hi Harakat al-Muqawama al-Islamiya tih lamtawi niin saptawng chuan ‘Islamic Resistance Movement’ tihna a ni a, Arabic tawnga Hamas hi ‘thathona, phurna, thahnemngaihna’ tihna a ni.

An pawl hi Israel tichhe tur hrim hrima indin an ni a, Islam ram din an tum a ni.

Kum 2007-a Gaza-a thuneihna an chan hnuah Israel nen hian vawi eng emaw zat an lo inkap tawh.

Anmahniin an kah thin bakah hel pawl dangte pawh an awp chin hmun atanga kah phalna an pe thin a; rocket tam takin Israel an lo kap tawh a, thil dang hmangin an bei fo bawk.

Israel pawhin a chhan let nan thlawhna atangin a kap fo thin a, an indo tawh vawi hnihah Gaza-ah hian sipai tam tak a thawn lut tawh bawk a. Egypt nen kum 2007 atang khan Gaza Strip luh hi an khap bawk a, venhimna thil vang niin an sawi ve ve.

Hamas leh an sipai pawl, Izzedine al-Qassam Brigades-te hi Israel, United States, European Union, UK leh ram lian dang tam tak chuan firfiak pawlah an dah bawk.

Iran-in a thlawp tlat thung a, suma an puih thin bakah ralthuam an pe a, an sipaiten training an pe thin bawk.

Gaza Strip ve thung hi

Gaza Strip hi km 41-a sei, km 10-a zau, Israel, Egypt leh Mediterranean Sea ten an hual ram bung pakhat a ni.

A tirah chuan Egypt-in an luah thin a, Middle East War 1967 atang khan Israel-in West Bank leh East Jerusalem nen a la a. Kum 2005 khan sipai a dahte leh an mi cheng 7,000 vel chu a ko let vek tawh thung.

Tunah hian mi maktaduai 2.3 chuang an cheng mek a, khawvela mihring bitna ber pakhat a ni mek.

Israel hian Gaza chung boruak leh a vaukam hrul a la thunun a, an inrinaa mihring leh bungraw lut leh chhuak tur reng reng khuahkhirhin harsa tak chauhvin paltlang theih a ni.

Hetiang bawk hian Egypt pawhin an ram atanga Gaza luh leh chhuah hi a khuahkhirh khauh hle bawk.

Gaza-a cheng 80% chuang hi ram leh pawl puihna ringa nung an ni tih UN chuan a sawi a, mi maktaduai khat chuang mah hi ni tin ei khawp an dawn ring an ni.

Hamas-ten an rin lawk loh taka an beih hnuah khan Israel chuan Gaza hi ‘lak luih’ an tum tih puangin electricity, tuialhthei, ei tur, bungrua leh tui an lak luhna zawng zawng an tihtawpsak vek.

Tunah hian an power station pui ber chuan tuialhthei a tlakchham tak avangin Gaza-ah hian electricity an tlachham hle tawh a. Electricity a awm loh chuan tui leh bawlhhlawh an paih leh sawngbawlna pawh a chawlh thuai a ngai dawn.

Gaza-a chengte hi power nei turin generator chauh innghahna an nei tawh a, chu pawh a tui thun tur an nei thei dawn em a hriat rih loh.

Palestine ve thung hi le...

East Jerusalem telin, West Bank leh Gaza an tihte hi Palestinian territory tia hriat an ni a. Roman-hovin ro an rel lai atanga kum zabi 20-na laihawl thleng khan Israel pum hi Palestine tia hriat a ni thin bawk.

Bible-ah Juda lalram tam tak a ding tawh bawk a, Judate hian tun hma atang tawha an ram (ancient homeland) nia an chhal chhan pawh a ni.

Kum 1948-a Israel ram a lo pian pawh khan Israel ram a awm/pian duh lo leh pawm lotute chuan Palestine tiin an ko zui reng a ni.

Palestinian-te ngei pawh hian Palestine tih hi West Bank, Gaza leh East Jerusalem sawi kawp nan an hmang bawk.

Engvangin Hamas a chet thut?

Inrinnia hel pawlin Israel an beih kha Israeli-Palestinian boruak sosan lai ni mah se khati teh thut kha rinlawk a ni lo.

Kumin hi Israeli-te awp West Bank-a Palestinian chengte thihna thlen tam ber kum a tling a, hei hi Hamas-in Israel an beih chhan, phuba an lakna nia ngaih a ni.

Hamas-ho hian Israel laka hnehna chan hi Palestinian mi pangngai/nawlpui laka an tlaktlum zawk theih nana thil tha tak niin an ngai bawk.

An beih ruala Israeli thahnem tak mana an hren zui chhan pawh Israel-in an tan ina Palestinian 4,500 vel tang mek an chhuah theih nana nawr nana an tih a nih rin a ni a; hei hi a hlawhtlin chuan Palestinian tan chuan hlawhtlinna ropui tak a ni ang.

Inrinnia beihpui an thlak chu Israel nena inhaw em em reng, Iran duan a nih rinna a awm bawk a; mahse, Iranian Supreme Leader erawh chuan an ramin inrawlhna an nei miah lo niin a sawi tawh thung.

Iran leh Hamas te hi tun hnaia Israel leh Saudi Arabia ramten inremna an siam duh lotu langsar tak pahnih an ni.

Hetia Hamas-in an beiha Israeli sipaiten an chhan let chiah hian Arab ram dangte a tihthinrima an lama an tan thar leh an beisei nia ngaih a ni bawk.

Hamas lo chet tawhna nen an khaikhin

Tun tuma Hamas chetna hi Gaza atanga an chetna lian tham ber nia ngaih a ni a, Israel lam tan chhuan tam tak hnua ramri kâna beihna an tawh nat ber a tling bawk.

Helho hian Gaza leh Israel indaidanna chu hmun tam takah an zai kua a ni.

Israeli-te chenna hmun pakhat, Kibbutz Kfar Aza-ah phei chuan an che na hle a, Israeli general chuan nausen thlengin an that niin a sawi a. Israeli sipaite chuan an mi thah thenkhat chu an lu tansak an nih thu an sawi bawk.

Hamas-in an beih thutna avang hian Israel-a thi chu mi 1,200 an tling tawh a, Israeli thlawhnaten Gaza an kah letnaah mi 1,000 chuang an thi tawh bawk.

Israeli intelligent-te hriat lawk loh thil

Israel hian an ram chhunga venhimna lam thawktu, Shin Bet leh ram pawna enthlatu, spy agency Mossad an nei a. Heng bakah hian Israel Defense Forces (IDF) an la nei bawk a; mahse, tute mahin thil thleng kha an hre lawk lo tlat.

Israel hi Middle East ramte zingah chuan an intelligence service-te thuam tha ber leh sum pawh dahsak tam ber an ni a; Palestinian hel pawlte zingah ngei bakah Lebanon, Syria leh hmun dang dangah agent an nei bawk.

Gaza leh Israel ramri hungnaah thlalakna an dah vek a, leia thil che hre thei (ground-motion sensor) an dah bakah uluk takin sipai an patrol reng bawk.

Barbed-wire-a ramri an hungna chhipah hian ‘smart barrier’ tia an sawi mai, ramri kân ruk tum leh beih tumte hre thei an dah vek bawk a ni.

Heng hmanraw tha leh mihring inchhawp teuh mah se Hamas helho hian awlsam takin an kalna tur an nawr kua a, ramri hungna wire an zai chat a, tuipui atang leh paraglider hmangin Israel ramah mi bei turin an lut teuh thei a ni.

Engtiangin nge US a inrawlh?

America hi Israel ram thian tha ber zinga mi a ni reng a, hruaitu inthlak thin mah se an inzawmna a derthawng ngai lo.

Hamas-ten Israel an beih chiah khan US hian an aircraft carrier, lawng leh indo thlawhnate chu Mediterranean khawchhak lamah an tawlh lut tih a puang nghal a, Israel-in hmanraw mamawh a neih pek a tum thu a puang nghal bawk.

Heng thil a tih chhan hi Israel lamtang a nihzia a tihlanna a nih bakah Lebanese hel pawl chak tak, Israel hmelma leh Hamas thlawptu, Hezbollah-te chu Israel bei lo tura a vaukhanna a ni nghal.

Inrinnia Hamas chetnaah khan ram dang 16 chuang khua leh tui thi an awm a, an zinga 14 chu US mi an ni a. Mi an mana Gaza lama helhovin an hren mek zingah American an awm nual bawk.

Kum 1973-a thil thleng leh tuna Hamas chetna khaikhinna?

Hamas chet thawhna hi mi tam tak chuan Israeli-ten Yom Kippur War 1973 an tih nen an khaikhin nasa hle a. Kum 50 dawn liam taah khan Israel hi Egypt leh Syria tangdun chuan Judate chawlh, Yom Kippur-ah an lo bei thut tawh a ni.

Israel-in a hnawh kir hmain Arab sipaite hi thuk tak an lut hman.

Indonaah hian Israeli sipai 2,656 an thi a, sang telin hliam an tuar a. Arab lamah hian sipai 18,000 vel an thi ve bawk a, hliam tuar phei chu an tam hle.

Arab ram hnihten an beih thut hi Israel inrin loh lai, an inthlahdah lai tak niin mi tam takin an tuar a, hei hian Israeli-te rilru pawh tiharhin hetiang thil a thlen nawn tawh lohna turin sipaite chu inralring renga awm tura thil kalpui an tih phah ta a ni.

Chutiang karah chuan tun tumah hian an hmelmate chuan an invenna zawng zawng paldarhin an chhu leh ta thut tho a ni.

Israel leh Arab ram dangte thlirna

Hamas sipai commander Mohammed Deif-a chuan Palestinian leh Arab ram dang zawng zawngte chu hel pawl beihpui thlakna thlawpa ‘Israeli ram luah zawng zawng la vek’ turin a sawm.

Tun dinhmunah Deif-a sawmna leh ngenna hi engtiang takin nge West Bank leh East Jerusalem bakah hmun danga Palestinian awmten an ngaih tih a la hriat rih loh.

Israel chuan indona lian zawk a chhuak thei tih a hre chiang a, kil hrang hrang atanga nawrtu pawh a neih belh thei tih a hre chiang bawk.

Tuna lang nghal pawh Lebanon atangin Hezbollah movement-in Hamas ang bawkin an kap ve nghal chat a ni.

Hamas-hovin an luhchilh atang khan Iran-in a thlawp hel pawl hian Israel hmar lama missile leh laipui vawi tam tak an kap tawh a. Israeli sipaite pawhin chhangin Hezbollah tanhmun leh an hmun dang an bitum ve bawk.

Israeli sipaite hian an sipaite ko khawmin Gaza Strip pawh thlawhna atang mai ni lo, lei lamah pawh an rûn ngei a rinawm ta hle.

Tun hnaia reserve atana an lakte nen sipai 3,00,000 zetin Gaza ramri an pan khawm tawh tih an sawi a, ‘tih tur tuk an nih veleha hlen nghal turin an inring tawh’ niin an sawi.