World Health Organization (WHO) chuan Gaza City-a al-Shifa damdawi in an tlawh hnuah ‘thihna hmun’ tiin a sawi.

Damdawi in hi Israeli sipaiten luaha a awmte an chhuah hnuah WHO kaihhruaiin UN team-in darkar khat lai an tlawh.

Inkahna leh laipuiin a dun fuhna hnu tam tak an hmu a, damdawi in tuala a hlawma mi an phumna hmunte pawh an en fiah.

He thlanmualah hian mi 80 phum an ni.

Damdawi in director chuan Israeli sipaiten chhuahsan tura a tih avangin a awm laite an chhuak nia a sawi laiin sipaite chuan director-in chhuahtir tura a ngen avangin an chhuak zawk niin an sawi a. Gaza-a damdawi in tha ber leh lian ber ni thinah hian na zual mi 300 chauh an awm tawh a ni.

WHO hian a la awm mekte leh thawktute pawh a rang thei ang hmun danga sawn dan an ruahman a, inkahhai puang turin a ngen nawn bawk.

Mi tam tak, damlo eng emaw zat telin, al-Shifa hi Inrinni khan an chhuahsan hlawm a. Thawktu thenkhat chuan chhuak turin an ti a, Israel chuan a hnial thung.

al-Shifa damdawi ina chanchinbumi awm pakhat chuan ‘che thei lo damlo leh doctor tlem chauh’ an awm tawh niin BBC a hrilh.

“Kan ban kan phar a, puanzar var kan keng bawk,” tiin Khader-a chuan a sawi.

“Nizan khan thil puak ri leh silai ri kan hre zankhua a. Bulldozer-in damdawi in tualah lei a hai khuar bawk a, building thenkhat hi a khawih tel bawk,” a ti.

A hmain Hamas hnuaia health ministry chuan damlo 120 an la awm a, pian hun hmaa piang naute eng emaw zat an awm bawk niin a sawi.

Israel Defence Force (IDF) chuan al-Shifa chhuahsan turin an ti nia puhna phain director-in a ngen zawk a, pawmsakin ‘kawng him’ an tihah an chhuak hlawm niin an sawi.

Dr Ramez Radwan-a erawh chuan Israeli thuneituten chhuak turin an ti niin a sawi thung a, damdawi inah a ipik lutuk niin a sawi a. “Nachhawkna leh antibiotics a awm lo va, damlo thenkhat hliam chu a lung tawh a ni,” a ti.

Israeli sipaite hian tun hnai khan damdawi in hi an luhchilh a, ‘Hamas laka an beihpui thlakna’ niin an sawi a. Hetih lai hian damdawi in hnuaia leiverhah helho hi an inchhek nia an sawi finfiahna engmah a la awm lo thung.

Israel hian Hamas chhut chimih a tum a, hei hi October 7-a an ram rûna mi 1,200 an thah bakah mi 240 chuang an man phuba lakna atana an tih a ni.

Hamas hnuaia health ministry chuan Gaza-ah hian mi 12,300 chuang an thi tawh a, inbeihna avanga in chim leh thil tlusawp karah mi 2,000 chuang an inphum an ring tawh bawk.