Israel chuan US atanga nawrna nasa tak a nawr hnuah Gaza Strip-ah ni khata truck phur hnih tuialhthei phurh luh a phal dawn ta.

US State Department hotu chuan ni hnih zelah tuialhthei litre 1,40,000 vel dawn a ni ziah tawh dawn niin a sawi.

Tuialhthei phurh luh zinga a tam ber hi puihna thil phur kualtu truck dangte tan a ni ber dawn a, UN-in tui leh thianghlimna atana hmanrua a sem bawk ang tih a sawi.

Heng bak zawng hi chu tuialhthei an tlakchham avanga hman hleih theih loh mek, mobile phone leh internet service atan hman a ni ang.

Zirtawpni khan Gaza-a inbiakpawhna petu company chuan UN hnuaia Palestinian raltlante buaipuitu, Unrwa atanga tuialhthei an dawn hnuah an inbiakpawhna an tinung leh thei tih an sawi.

US thuneitu sang hian Washington-in Israel chu tuna tuialhthei phurh luhna tur hian nasa takin a nawr tih a sawi.

Kal dan thar tur hi chawlhkar hnih liam taah khan a thuphung chuan pawm a lo ni tawh a; mahse, Israel hian chhan pahnih avangin a takin a kalpui duh lo va. Israeli thuneitute chuan US hnenah hian Gaza chhim lamah tuialhthei hi an la tlachham lo niin a hrilh a, mi hren mekte chhuah an ni dawn em tih a ngaichang bawk.

Ningani khan Unrwa hotu chuan tuialhthei an tlakchham avangin an chetvelna thin zawng zawng an chawl tih a sawi tawh.

A hmaa report an siamah an agency chuan ‘mihring mamawh zualpui buaipui nan ni khatah tuialhthei litre 1,60,000 an mamawh’ niin an tar lang a, hei hi inremna let aia tam daih a ni.

A hmain Israeli thuneitu sang pakhat chuan tuialhthei hi Rafah crossing atangin UN kaltlangin Gaza Strip chhim lama vantlang tan pek an ni dawn tih a lo sawi tawh a, hei hi Hamas kuta a luh loh nana tih a ni.

Tuialhtheite hi tui, bawlhhlawh leh thianghlimna thila hman tur atana tih a ni a, hei hi hri a len chiam lohna tura an ruahman a ni tih a sawi bawk.

Khawvel huap pawl hrang hrang chuan Gaza Strip-ah hian nunau khawsak a buai lutuk chu an aupui nasa hlawm tawh hle.

World Health Organization (WHO) chuan tuialhthei an tlakchham avang hian Gaza-a hri a len theihna chu a sang hle tawh tih a lo sawi tawh a, Israeli-ten damdawi in leh inthiarna vel an bomb nasa bawk niin a sawi.

Zirtawpni khan Palestinian Territories-a WHO aiawhtu, Richard Peeperkorn chuan thawk lama harsatna nei mi 70,000 leh kawthalo mi 44,000 chuang an awm mek tih a sawi niin Reuters chuan a tar lang a, a tak takah phei chuan hei aia tam daih a nih rin a ni.

Israel-in tun tuma Gaza a rûn chiam hi October 7-a Hamas hel, UK, US leh ram lian dangten firfiak pawla an puanten an ram beia mi 1,200 zet an thah bakah mi 230 zet an hren zui chhan letna a ni.

Israel-in Gaza Strip-a thuneihna changtu, Hamas laka phuba alak meknaah hian mi 12,000 vel thi an awm tawh niin Hamas enkawl health ministry chuan a sawi.

Tuialhthei hi indona a chhuah phat atangin buaipui nghal a ni a. Gaza-ah hian tui tihthianghlim nan te, in leh damdawi in atan bakah inthiarna, inkalpawhna leh inbiakpawhna atan an mamawh a. A awm lo chuan puihna lut sem kual pawh a theih loh nghal bawk.

Israel chuan Gaza-a tuialhthei lak luh chu a dang hmiah thung a, vantlang tana phurh luhte chu Hamas-in an sipaite hman tura ru thinah a puh.

Indona a chhuah hma zawng kha chuan Israel hian Gaza-a electricity zawng zawng deuhthaw hi a pek luh a ni a, anmahni pualin power plant pakhat chauh an nei ve a, hei hi tunah phei chuan a hman theih rih loh.