Aizawl November 16, 2022 : Commerce & Industries Minister Dr R. Lalthangliana chuan vawiin khan AR Ground-ah International Tourism Mart, 2022 ‘ITM 2022’ puala buatsaih State Mega Exhibition a hawng. Khuallian chuan Mizoramah sawrkar kallai hian Tourism hi Industry-ah kan puang a , kan pawm. Hmalak dan te pawh thlak danglam a ni a, rah tha kan hmu chho zel, a ti.

Hawnna inkhawma thusawitu khuallian Dr R. Lalthangliana chuan tunhnaiah Tourism Department an thang chak hle a, hma an lakna pawh hmuh tur a tamin hna an thawk nasa tih a takin kan hmu thin a, a lawmawm takzet a ni, a ti a. Hetiang thil pawimawh leh hautak zet kan thleng thei hi a lawmawm takzet a, hei hian Tourism sector ah Mizoram mai bakah India hmarchhak state te tan bung thar min kaitir ngei se a duh thu a sawi bawk a ni. Tourism industry hi khawvel ram dangah chuan tak takin sum hnar berah an hmang a, Mizoramah pawh tun sawrkar kallai hian Tourism hi Industry ah kan puangin kan pawm a, hemi hnu hian hmalak dante pawh thlak danglamin a rah tha kan hmu chho mek zel a ni, a ti bawk.

He huna Khualzahawm Tourism Minister Robert Romawia Royte chuan, ITM, 2022 huaihawt tura hma an lak dante tarlangin hemi atana tha thawhtu zawng zawngte chungah lawmthu a sawi a, India hmar chhak State hrang hrang atangin an rawn tel tih sawilangin he ITM, 2022 hi chhim turin mi zawng zawng a sawm a ni.

ITM hi India hmarchhak state te'n Tourism lama hmasawnna a neih theihna tura Ministry of Tourism in a buatsaih thin a ni a, kum 2013 atanga neih tan niin hmarchhak state hrang hrang ten inthlen chhawk thin a, Mizoramin ITM a thlen vawikhatna a ni a, November ni 16 atanga ni 19 chhungin neih a ni ang.

Mega Exhibition ah hian stall hrang hrang 76 a awm a, November ni 16 – 19, 2022 chhungin chawhma dar 11:00 – zan dar 9:00 thleng neih thin a ni ang.

He hunah hian Tourism Development Board Vice-Chairman TC Pachhunga, Board memberte leh Tourism Principal Secretary Manisha Saxena, Commerce & Industries Principal Secretary Esther Lalruatkimi bakah official  dang te an tel a ni.