Ruah sur nasa tak avanga Japan ram lailia Atami khawpuiah lei nasa taka minah mi 20 vel an chin hriat lohvin an awm mek.

Social media-a thlalak thehdarhah chuan tlang atangin chirh dum tak a tawlh nasa hle a, khawpui chhungah tui ang maiin a luang lut a. Chenna in tam tak chhia leh chhilh a nei.

Kyodo news agency chuan port district-ah ruang pahnih hmuh a ni tawh tih a sawi.

Thil thlen laia awm pakhat chuan hmun sang lama a tlanchhiat hmain thawm rapthlak tak a hriat thu a sawi.

Prime Minister Yoshihide Suga chuan chhiatna thlenna hmuna thawktute chu a rang thei anga che turin a ti a, Pacific tuipui kam hnaiha tun hnaia ruah sur avanga chhiatna dang thleng thut thei lakah pawh inring turin a ti.

Shizuoka prefecture-a awm, Atami hi nipui laia mi tlawh nasat thin a ni a, July thla tir atang khan  ruah a la sur char char a, kum danga tun thlaa sur thin ang zat aia tam a sur tawh a. An thenawm, Kanagawa prefecture nen an inang vel mek.

Japan hi tlangram, mihring tamna a ni a, leimin pawh a tam hle thin niin BBC chuan a tar lang a. Hetih rual hian sik leh sa inthlak nasa lutuk chuan khaw awm dan uchuak tak tak - khaw lum lutuk, ruah tam, vawt lutuk leh chhiatna thlen thei khawp thil a tam sawt tawh niin a tar lang bawk.

Lei tawlh hi an ram sanaa nimin chawhma dar 10:30 (India-a zing dar 7:00 vel niin khawpuia chengte chuan an sawi.

Thil thleng hmutu pakhat chuan, NHK hnenah, “Thawm rapthlak tak ka hria a, hnuai lam pana chirh tawlh ka hmu zui a, chhanchhuah hna thawktuten mipuite chu tlanchhe turin an ti nghal a, kei pawh hmun sang lam ka pan nghal a ni,” a ti.

Police, kangthelh  pawl leh Japan-a sipaiten mi bote zawn hna hi an thawk nghal mek.