DOWNLOAD OUR APP

Read latest news on your phone
app-store
JAPAN LIRNGHING: Mi 55 thi tawh, kangmei a chhuak zui nasa
Jan 02, 2024

Kum thar nia lirnghing na takin a sawi, Japan-ah chuan mi 55 thi an awm tawh a, chhanchhuah hna thawh mek zel niin kangmei a chhuak zui nasa hle bawk.


In tam tak a chim a, inte chu a kang bawk a, kawngpuite pawh a chhe nasa hle a, hei hian chhanchhuah hna pawh a tihbuai phah deuh.


Magnitude 7.6-a na lirnghing hi an ram laili, Noto peninsula atanga intan a ni.


Japanese Prime Minister Fumio Kishida chuan emergency service-te chu nung dama chhanchhuah turte chhan tumin ‘chak takin an bei’ tih a sawi.


Thawhlehni khan Kishida hian chhanchhuah hna thawktu mi 3,000 velin Noto peninsula hmun hrang hrang an pan tih a sawi a. Helicopter hmangin kangmei chhuakte leh in leh thil dang tlute tlawh kual a ni bawk a. Noto-a a hmar tawp ber, Wajima khawpui chu kawngpuia tlawhpawh theih a ni rih lo.


Japanese military-in ei tur, tui leh blanket sem buaipuiin an chenna in atanga thiar chhuahte an pe a. Sorkar chuan mi 57,360 lai hmun him zawkah thiar chhuah an nih thu a sawi.


A tuar na zual hmunah hian ei tur sang tam tak thlen tawh a ni.


Thawhtanni leh Thawhlehni nileng deuhthaw khan nghing nawn a awm reng a. Japan-a chief cabinet secretary Yoshimasa Hayashi chuan a dang a la thawh theih avangin ‘inring’ turin a ti a, ‘magnitude 7 thleng a ni thei’ niin a sawi.


Noto peninsula chhim lam km 144-a hla, Ishikawa-ah chuan Thawhlehni chawhnu khan megnitude 4.9-a nain a nghing leh a ni.


Japanese sorkar hian Thawhtanni khan tsunami na tak thawk thei avanga ralkhel dar a vua a; mahse, tunah chuan tihhniam leh a ni a. Thawhlehniah khan Sea of Japan hrula inralrinna zawng zawng tihtawp a ni zui ta bawk.


Mi tam tak chuan kum 2011-a lirnghing leh tsunami thleng, mi 18,000 zet an thihna leh Fukushima-a nuclear plant-a chhiatna a thlen tum kha tun tum lirnghing hian a hriat chhuahtir thu an sawi hlawm.


Lirnghing avanga an buai lai hian Thawhlehni khan Japan Airlines thlawhna chu Tokyo-a Haneda airport-ah lirnghing tuarte chhawmdawl hna thawktu tura tirh coastguard thlawhna nen an insut avangin a kang vak bawk.


Coastguard thlawhnaa chuang mi panga an thi tih finfiah tawh a ni a, Japan Airlines-a chuang leh thawktu mi 379 erawh him taka lak chhuah an ni.


Japan hi khawvela lir a nghin duhna ber pakhat a ni a, a awmna lai hi tectonic plate tam tak intawhna lai a nih avangin Pacific Ring of Fire tia sawi a ni.


Lirnghing mai thei reng laia awm an nih avangin Japan hian khawvela tsunami warning system changkang ber ber pawh an duan chhuah phah ve thung.

India leh Myanmar Border Fencing
India leh Myanmar ramri hung tum chungchang hi eng nge i ngaihdan?
Hung hi tha ka ti lo
Hung se ka ti
Ngaihdan ka nei lo

Latest News & Chhiar Hlawh