Japan chuan magnitude 7.6-a na lirnghingin an ram laili a sawi hnuah ‘hmanhmawh taka inthiar chhuak’ turin mi chengte a hriattir nghal.

Ishikawa-a tuipui kam, Nota-a chengte chu tsunami na tak thawk thei a nih avanga inralring tura tiin metre ngaa sang tui fawn a awm thei niin an sawi.

Thuneitute hian an thenawm, Niigata leh Toyama prefecture-ah pawh tui fawn hi metre thum thlenga sang a ni thei bawk tih an sawi.

Television-ah ‘inthiar chhuah tur’ tih chu hawrawp lian taka tar langin mi chengte chu khaw vawt tak hnuaiah hmun sang lam pan thuai turin an ti.

NHK presenter pawhin thlirtute hnenah, “In in, in thil neih hlute kan hria; mahse, thil dang zawng aiin in nunna a pawimawh a. A theih angin hmun sang pan rawh u,” tiin a puang.

Mipuite pawhin Thawhtanni, kum thar ni taka lirnghingin an chenna in leh lei hnuai rel a sawi dan video-te an thehdarh hlawm.

Japan Meteorological Agency (JMA) chuan Thawhtanniah hian minute 90 chhungin lirnghing indawt zatin vawi 21 a thlen hman thu leh magnitude 4.0 leh a aia na a ni hlawm tih a sawi a. A na ber chu tlai dar 4:10 (India-a chhun dar 12:40)-a 7.6-a naa thawk a ni.

Tual chhung chanchinbute chuan tun tum hi kum 2011-a lirnghing na takin Japan hmarchhak a sawi tuma tui fawn metre 40 zeta sang a insiam hnua ‘tsunami warning lian tham’ pek chhuah leh hmasak ber a nih thu an tar lang hlawm.

Japan hi khawvela lirnghing awm duh berna laia awm a ni a, tectonic plate eng emaw zat intawh khawmna niin Pacific Ring of Fire an tih lai a ni a. Lirnghing a tam avangin tsunami warning system tha ber ber pawh duang chhuaktu an ni.

Thawhtannia lirnghing a intanna hnaiha kawngpuite chu khar a ni a. Chhungkaw 36,000 chuang zet chuan heng lai velah hian power an nei lo niin a pe chhuaktu, Hokuriku Electric Power chuan a sawi.

Japan-a nuclear thuneitute chuan lirnghing leh tsunami thawhna lai bul hnaia ‘nuclear power plant atanga radioactivity put a hlauhawm loh’ niin an sawi.

Sorkar thupuangtu, Yoshimasa Hayashi chuan mi chengte chu lirnghing dang pawh thleng thei a nih avangin inring turin a ti.

South Korea-a meteorological agency pawhin an ram khawchhak lam vaukamah Thawhtanni tlai dar 6:29 leh 7:17 inkarah tsunami tui fawn metre 0.3-a sang a insiam thei niin an sawi ve bawk a. Tlangram, Gangwon province-a chengte chu hmun sang lama insaseng turin an ti.

Russia pawhin khawchhak lam kila lawngchawlhna, Vladivostok leh Nakhodka-ah tsunami warning a tichhuak ve bawk niin sorkar news agency TASS chuan a puang.

Kum 2011 khan Japan hi magnitude 9.0-a na lirnghingin sawiin tsunami insiamin hmarchhak vaukam a hrut vak a, mi 18,000 dawn thiin mi sang tam takin in leh lo an chân bawk.

He mi tuma tui fawn hian Fukushima power plant pawh khawihin Chernobyl-a nuclear chhiatna rapthlak tak a thlen hnua a rapthlak leh ber a thleng leh thelh nghe nghe.