Japan ram hmun thenkhata ruah nasa taka sur avangin mi maktaduai chuang hmun himah insawn tura hriattir an ni.

Ruah sur nasa avang hian prefecture tam takah inralrinna dar khawn rik a ni a, heng zingah hian Fukuoka leh Hiroshima pawh a tel.

Nagasaki prefecture-a lei min avangin chenna in pahnih chhiaah hmeichhe pakhat a thi a, a pasal leh an fanu chu chin hriat lohvin an la awm mek bawk.

Chhiatna thlenna hmunah hian sipai, police leh kangthelhtu mi 150 vel chhanchhuah hna thawktute tirh luh an ni.

“Uluk takin chin hriat lohte hi zawn hna thawh a ni a, ruah hi tam tak a la sur reng bawk avangin lei tawlh thut thei reng a la ni bawk,” tiin tual chhung thuneitu pakhat chuan AFP news agency a hrilh.

Ruah hi an ram khawthlang lamah a sur nasa zual a; mahse, khawchin zirtute chuan an ram hmun dangah pawh a sur zui dawn niin an sawi.

Meteorological agency-a mi, Yushi Adachi chuan tun tuma ruah sur hi an beisei loh leh an hriat lawk loh a nih thu a sawi.

“A sur danah hian chhiatna dang a thlen zui leh pawh a rinawm hle a ni,” tiin Adachi hian a sawi bawk.

Tualchhung television-te chuan kawngpui chhiate an tilang a. Saga leh Fukuoka-a luite chu  a chim chin a sang zel niin NHK news chuan Inrinni khan a tar lang.

Tun tuma tui lian hi tun hnai lawka ruah nasa tak sur avanga tui lianin mi tam tak an thihpui hnua thleng leh a ni.