Commonwealth Games 2022-a India ram tana Gold medal la hmasa ber dawttu Jeremy Lalrinnunga chuan vawiin khan a rawn ha a, Mizoram Sport Minister hovin Lengpui-ah ropui taka lo hmuah a ni.  

Mizo zinga Commonwealth Games-a medal la hmasa ber Jeremy hian chawhnu dar 2:25-ah Lengpui a rawn thleng a, Sport lam thuneitu ten lo dawngsawngin amah lawmna hun tawi an buatsaih sak a, hemi hnu hian chanchinthar lakhawmtute nen inkawmna nei lehin chawhnu dar 3:15-ah Aizawl pan pui a ni. 

Lengpui-a lawmna tawi buaisaihna hmunah hian deparment leh mimal atangin lawmpuina a dawng tam hle a, Sport Minister Pu Robert Romawia Royte pawhin, Jeremy-a medal dawn chu a ngaihhlutpui zia leh a lawmpui zia lantir nan a fawh sak nghe nghe a ni.

Aizawl khawpui fan kualpui niin Hunthar atangin Bawngkawn lamah an lut chho a, Ramhlun lamah kalpui lehin Sikulpuikawn-ah an va kual a, Temple square atangin an veng Ainawm veng pan pui a ni. Khawpui dung an fannaah hian veng hrang hrang mipui thahnem takin amah lawmna thuziak nen an lo lawm a ni.